Fevralniñ 21, çarşenbe künü, Herson VDM-nde keçken brifingte, Ukrainanıñ işğal etilgen territoriyalar işleri boyunca nazirniñ muavini Yusuf Kürkçi, ilhaq etilgen Qırımda suv meselesi «kün sayın fenalaşqanı» aqqında beyan etti. Bu aqta Qırım.Aqiqat muhbiri haber etmekte.
Kürkçi, Herson vilâyeti devlet memuriyetine, Şimaliy-Qırım kanalı vastasınen işğal etilgen Qırımnıñ suvnen teminlenüvi kesilgeninen alâqalı malümat ve materiallar berilmesi ricasınen kelgen soravnı bu şekilde izaatladı.
«İşğal etilgen Qırımda suv meselesi kün sayın fenalaşmaqta. İşğalci ükümet artıq bu meseleni çezmek içün, bütün icadiy istidatını tüketti. Bugünki künde Qırımnıñ şimaliy qısmındaki topraqlarnıñ degradatsiya cereyanı öyle bir derecede devam ete ki, Qırım azat etilgen soñ, bu da çezilmek kerek olğan bir mesele olacaq. İşğal sebebinden aman-aman bütünley bozulğan topraqlarnıñ meleorativ alı ve infrastrukturası tiklenmek kerek olacaq. Bu yalıñız Şimaliy-Qırım kanalı degil de, bu suv yardımınen biñlernen-biñlernen gektar suvarılğan topraqlarğa saip olmağa imkân bergen infrastrukturanı da qavray», – dep qayd etti Kürkçi.
Onıñ sözlerine köre, Qırımnıñ rusiyeli ükümeti başlatqan esnas, daa ziyade içerdeki qırımlı istismalcı içün kerek.
«Qırımnıñ uydurıq işğalci rejiminiñ yolbaşçıları ukrain ükümetinen adalet içün küreş yapıla, suvnen bağlı ilâve hızmetler alına degen imkânğa saip olmaq içün yapalar. Bu - Qırımda olıp keçken bütün farsnıñ daa bir aktı», – dep izaatladı vaziyetni nazir muavini.
Daa evel Herson valiligi, Şimaliy-Qırım kanalı vastasınen, işğal etilgen Qırımnıñ suvnen teminlenüvi kesilgeninen alâqalı malümat berilmesi ricasınen kelgen advokat soravı alğan edi.
Ukraina Qırımnıñ tatlı suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen qarşılay edi. Rusiye Qırımnı işğal etken soñ, yarımadağa suv berilmesi toqtatıldı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
