Link açıqlığı

Saatnıñ esas haberi

QMC prokuraturası Qırımda Rusiye rejimininiñ uquqiy qamaçavı üzerinde çalışa – Mamedov


Fevralniñ 20-sinde Qırım MC prokurorı Gündüz Mamedov, Qırım Muhtar Cumhuriyeti Prokuraturası ilhaq etilgen Qırımdaki Rusiye rejiminiñ uquqiy qamaçavı boyunca çareler köre, dep bildirdi.

O, nezaret etici muessiseniñ, Rusiye akimiyeti tarafından Qırımda arbiy cinayetler ve insaniyetke qarşı cinaetlerniñ işlenmesi ve Ukraina vatandaşlarında olğan anayasa aq-uquqlarınıñ diger bozuluvları faktlarını tayin etkenini qayd etti.

QMC prokurorı: «Deñiz gemileriniñ yarımadadaki qapalı limanlarğa qanunsız kirip çıqqanlarına kelgende, bizim taraftan qanun bozğan gemilerniñ cedveli tizildi ve o, muntazam surette yañartıla. Bu yönelişteki işlerniñ beraberlikte yapılması içün 2017 senesinde Qırım MC prokuraturası, Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ işleri boyunca nazirligi, Ukrainanıñ İnfrastruktura nazirligi, Ukrainanıñ Devlet sıñır hizmeti, Ukrainanıñ Maliye hizmeti ve «Ukrainanıñ deñiz limanları memuriyeti» Devlet işhanesiniñ temsilcilerinden teşkil olunğan iş grubu meydanğa ketirildi. Qırım kökünde uçuşlarnıñ yapılması meseleleri de prokuraturanıñ diqqatı tışında qalmaylar», – dep qayd etti.

Ondan ğayrı Gündüz Mamedov, Ukraina Baş prokurorı Yuriy Lutsenkonıñ Ankarağa ziyaretinden soñ Türkiyeniñ Ticaret ve sanayi odasındaki deñiz ticaret odasınıñ rehberleri, deñiz naqliyatı ve liman işleri subyektlerine mektüp yollap, Qırımnıñ qapalı limanlarından kelgen gemilerniñ qabul etilmesini yasaq etti.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG