Link açıqlığı

Saatnıñ esas haberi

Ukraina İnformatsiya nazirligi Qırım ilhaqınıñ dörtünci yıllığında Kremlniñ mabüsleri aqqında ikâye etecek


Emine Ceppar
Emine Ceppar

Ukraina İnformatsion siyaset nazirligi, Qırımnıñ Rusiye işğaline qarşı muqavemetiniñ dörtünci yıllığına bağışlap, informatsion kampaniyanı azırladı. Bunı fevralniñ 20-sinde Kyivde yapılğan matbuat konferentsiyasında informatsion siyaset naziriniñ birinci muavini Emine Ceppar bildirdi. Onıñ aytqanına köre, kampaniyanıñ merkezinde faal pozitsiyaları ve Qırımnıñ Rusiye tarafından ilhaqına narazılıq köstermeleri içün zarar körgen adamlarnıñ taqdirleri buluna.

Ceppar: «Biz, er kün, er ay keçken sayın Kreml mabüsleriniñ sayısı ne içün, teessüf ki,arta, kösterecek olamız: adamlar Rusiyeniñ nizamını qabul etmek istemeyler. Sentsov, Kolçenko, Baluh, Degermenciler qorantası, Çiygoz, Umerov ve digerlerniñ keysleri bar. Bu yılnıñ kampaniyası muqavemetniñ muayen simvolları etrafında aylana. Baş mevzusı olaraq bu insanlarnıñ taqdirlerini kösteremiz, çünki bu, adiy bir vaqia olmayıp, Rusiye işğaliniñ qurbanları olğan ve öz noqtai-nazarları içün zarar körgenlerniñ taqdiridir», – dedi.

O, bu yılda nazirlik tarafından işlep çıqılğan ve cümleden ecnebiy auditoriya içün azırlanğan kontent «tamam bu taqdirler, adamlar, bu muqavemetniñ simvolları aqqındadır», dep qayd etti.

Onıñ aytqanına köre, Qırımnıñ Rusiye tarafından işğaline muqavemet köstermeleri neticesinde zarar körgen 64 Ukraina vatandaşı aqqında ikâye etken bilbordlar, videorolikler ve bukletler közde tutula.

Ukrainada fevral 26 künü, Qırımnıñ Rusiye işğaline qarşı muqavemet künü olaraq tayin etildi. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait olğan faaliyetçiler tura edi.

Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG