Fevralniñ 14-nde Rusiye Şimaliy-Kavkaz okrugınıñ arbiy mahkemesinde Yaltalı «Hizb ut-Tahrir işi» boyunca ilk mahkeme oturışuvı ötkerildi. Bu aqta Azatlıq Radıosınıñ muhbiri haber ete.
Advokatlarnıñ bir qısmı oturışuvda Qırımnıñ Aqmescit Garnizon mahkemesindeki videobağ vastasınen iştirak etti. Aqmescitte mahkemege ayrıca, qabaatlanğanlarnıñ aqrabalarınen jurnalistler de keldi, ancaq mahkeme, Rostov şeerinde açıq oturışıv şeklinde keçkenini sebep köstererek, mahkemeci istegenler anda barabile deyerek, olarnı oturışuv zalından çıqarıp yiberdi.
Mahkeme esnasında qabaatlanğan altı kişiden iç birisi de özüni qabaatlı dep tanımadı ve bazıları olarnı nede qabaatlamaq isgenlerini añlamağanlarını qayd etti.
«İddialarnıñ manası saçma. Nasıl etip de gizli çağıruv vastasınen Qırımda halifelik qurmaq mümkün? Ealiniñ bütünley işlâmlaşması ne demek? Dağıstan ve Çeçenistannıñ 90% musulman. Bu totalmi, telükelimi yoqsa başqa türlümi? Qabaatlavda: «dindarlar ekseriyet olğan bir bölgede» denilgen hucur bir ifade bar. Resmiy malümatlarğa köre, Qırımda biz 12% teşkil etemiz. Qabaatlavğa baqacaq olsaq, men Rusiye Federatsiyası devletiniñ siyasiy sistemasını al-azırda mevcut olmağan dünya halifelik terkibine qoşulması içün deñiştirmege areket etken ekenim. Qabaatlav iddianamesinde pek çoq zıddiyetler bar. «Men defalarca gizli toplaşuvlarda iştirak etken ekenim», amma yalıñız bir danesinen alâqalı vesiqa mevcut ve hususan er kes kirip olğan odada keçken. Ekstremistik edebiyat bulundıra ekenim, lâkin menden tutulıp alınğan kitaplarnıñ iç birisi Rusiyede yasaq etilmegen», – dep qayd etti öz çıqışında qabaatlanğan Emir-Usein Kuku.
Nevbetteki oturışuv fevralniñ 15-şi cumaaqşamı künü ötkerilecek. Şaatlarnıñ sorğulanması planlaştırıla.
Daa evel Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.
Yaltalı «Hizb ut-Tahrir işiniñ» figuranları Arsen Cepparov ve Refat Alimov 2016 senesi aprelniñ 18-nde Qızıltaşta tevqif etilgenden berli apiste yatalar. İlk dört Yaltalı «Hizb ut-Tahrir işiniñ» mabüsi 2016 senesi fevralniñ 11-nde tutulğan edi. Olardan arasında insan aqları Kontakt gruppasınıñ azası Emir-Üsein Kuku, qurucı olaraq çalışqan aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Sirük bar.
Yanvarniñ 24-nde Ukraina tış işleri nazirligi Rusiyeden Yaltalı «Hizb ut-Tahrir işi» boyunca tutlğan altı mabüsniñ azat etilmesini talap etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
