Rusiye tarafından ilhaq etilgen Qırımnı ziyaret etken alman siyasetçileri arasında Almaniya eñ yüksek timsaliy organınıñ iç bir deputatı yoq.
Deutsche Welle haber etkenine köre, Bundestagqa sayısı 93 olsa da, «Almaniya içün alternatif» fraktsiyası adından Qırım seyahatına kimse qoşulmağan.
Alman KHV malümatına köre, yarımadağa «Almaniya içün alternatif» firqası adından Berlin, Brandenburg ve Şimaliy Rein Westfalenden yerli parlamentleriniñ üç deputatı barğan eken. Olar fevralniñ 9-na qadar Qırımda qalacaqlar.
Rusiyeli informatsion agentlikleri bildirgenine köre, ziyaret esnasında siyasetçiler Qırımnıñ yolbaşçıları ve yarımadanıñ milliy-medeniy birleşmeleriniñ reberlerinen körüşecek, qurulğan büyük obyektlerni ve Qırımnıñ bir ziraat hocalığını ziyaret etecek ekenler. Bazar künü olar artıq Qırımnıñ Yalı boyunı ziyaret etkenler.
Bundestagqa yapılğan eñ soñki saylâvdan soñ, «Almaniya içün alternatif» firqası bir sensatsiya olğan edi. İşbu sağ konservetiv ve açıq-açıq Rusiye tarafdarı olğan siyasiy küç içün aman-aman 13% saylâvcı rey bergen edi.
Fevralniñ 3-nde Rusiye KHV, devletniñ yerli parlament temsilcisi olğan «Almaniya içün alternatif» firqasınıñ üç alman siyasetçisi ilhaq etilgen Qırımğa kelgeni aqqında haber etken edi.
Ukrainanıñ Almaniya elçisi Andrey Melnik bir qaç alman siyasetçisiniñ ilhaq etilgen Qırım yapqan seyahatını «mesuliyetsiz seyahat» dep adlandırğan edi.
Qırımğa çetel vatandaşlarını davet eterek, yarımadanıñ rusiyeli akimiyeti ilhaqnı qanuniyleştirmek istey.
Ukraina tış işleri nazirligi daima çetel vatandaşları ve vatandaşlığı olmağan şahıslarnı Rusiye tarafından ilhaq etilgen Qırımğa faqat Ukraina qanunları ve halqara qanunlarğa uyaraq kermege çağıra.
Ukraina MİDi daa evel, çetel siyasetçileriniñ Qırımğa kirişleri resmiy olmağanını beyan etken edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
