Qırımtatar Milliy Meclisiniñ reisi Refat Çubarov, Ukraina ve onıñ ğarptaki parntnörları, Kreml ilhaq etilgen Qırımda keçirmege planlaştırğan Rusiye prezidenti saylâvlarını tanımamaq kibi yekâne bir pozitsiya qabul etmeli, dep saya.
Bu aqta o Qırım.Aqiqatqa bergen intervyusında söz yürsetti.
«Eger Putin Rusiyeni idare etecek olsa, o zaman onıñ içün Qırımnı teslim etüv, qaytaruvdan ziyade telükeli vaziyet meydanğa ketirilmeli. Daa ziyade telükeli şartlardan biri de Rusiyenin içerden patlaması – yıqılması, isyan. Zimaneviy dünya, Ukraina ile bizim partnörlarımız böyle şartlar azırlamağa küçü yeter. Sanktsiyalarnı maksimum arttırmaq kerek, Rusiye ve onıñ idarecileriniñ epsini dünyada olıp keçken ve Rusiyeniñ özü içün ayatiy emiyet taşığan bütün esanaslardan ayırmaq kerek», – dep beyan ete Çubarov.
Onıñ sözlerine köre, Qırımda Rusiye prezidenti saylâvlarınıñ keçirilecegi «epimizni bu saylâvlarnı tanımamaq kibi yekâne bir pozitsiya qabul etme zorlamalı».
«Saylâvlar ve hususan Qırım territoriyasında da keçirilecek saylâvlar neticesinde prezidentlikke saylânacaq şahısnıñ maqamını tanımamaq kibi.Eger dünyada böyle bir şart qoyulğan olsa edi, Putin tolu şahsiy izolyatsiyağa tüşken olur edi», – degeninde emin Çubarov.
Yanvarniñ 27-nde Çubarov, milleti qatiy nazar Qırım sakinleriniñ epsini martnıñ 18-nde yarımadada keçirilmesi planlaştırılğan Rusiye prezidenti saylâvlarını boykot etmege çağırğan edi.
Rusiye prezidentiniñ saylâvlarını 2018 senesi martnıñ 18-nde – Qırım ilhaqınıñ yıllığında ötkermege planlaştıralar. Daa evel saylâv kününiñ başqa künge avuştırılmasını közde tutqan munasip qanun, Rusiyeniñ Devlet duması ve Federatsiya Şurası tarafından tasdiqlanıp, Rusiye prezidenti Vladimir Putin tarafından imzalanğan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
