Ukraina Yuqarı Radası insan aqları, milliy alıqlar ve milletlerara munasebetler komiteti çerçivesinde fevralniñ 1-nde, Avropa Şurası ve Avropa Birliginiñ «Ukrainada milliy azlıqlarnıñ imayesini pekitüv» adlı yañı ortaq leyha muzakere etildi. Bu aqta Qırım.Aqiqatqa körüşüv iştirakçisi, Qırımtatar Milliy Meclisiniñ reisi Refat Çubarov ikâye etip berdi.
O, leyhanıñ maqsadı – milliy azlıqlarnı imaye etmek içün uquqiy ve institutsional esaslarni pekütüv içün Ukraina ükümetine yardım etmekten ibaret olğanını ayttı.
«Körüşüvde men, soñki dört yıl içinde Rusiye kibi küçlü bir devlet qurbanı olğan devletniñ cemiyeti ukrain devletiniñ ayaqta qalmasına telüke olğanını is ete yatqanını ayttım. Cemiyetimiz özüni, bu mürekkep dünyada onı qorçalaycaq dep sayğan bütün yönelişlerde imaye etmege mecbur», – dedi Çubarov.
Qırımtatarlarnıñ lideri Mustafa Cemilev bergen malümatqa köre, Qırım Rusiye tarafından ilhaq etilgen soñ, yarımadanı onıñ 20 biñ sakini terk etmege mecbur qalğan.
2014 senesi martnıñ 20-nde Yuqarı Rada qırımtatarlarnı Qırımnıñ tamır halqı dep tanıdı. Bu qararğa 283 deputat qoltutqan edi. Ukrainanıñ tamır halqı olğan qırımtatarları ve diger milliy azlıqlarnıñ etnik, medeniyet, til ve din hususiyetleriniñ saqlanıp qalması ve inkişafına kefil olacağını vaad etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
