Qırımda tevqif etilgen qırımtatar faali Bekir Degermenci SİZOnıñ tibbiy bölüginde tutula. Bunı fevralniñ 1-nde Qırım.Aqiqatqa advokar Edem Semedlâyev ikâye etip berdi. Tevqif etilgen şahısnıñ alı fena degil.
«Soy-sopu ketirgen ilaclarnı içe. Şimdilik, o SİZOda tutulması mümkün degen tezkereden ğayrı, elimizde başqa bir vesiqa yoq, amma taqiqatçı onı bu alda tutmaq mümkün dep ayta. Bizler apiste qaluv müddetinen alâqalı appelâtsion şikâyet berdik, lâkin o daa baqılmadı», – dep ilâve etti imayeci.
Kreml nezaretindeki Aqmescit Kiyev rayon mahkemesi yanvarniñ 12-nde «Veciye Kaşka işi» figurantlarınıñ tevqifini eki ayğa uzatqan edi.
Bekir Degermencide devamlı astma bar ve onıñ alı SİZOda fenalaştı. Dekabrniñ 6-nda Kreml nezaretindeki Qırım Yuqarı mahkemesiniñ zalında faalge «acele yardım» çağırıldı. Dekabrniñ 14-ne keçer gecesinde o, reanimatsiyağa tüşti.
Dekabrniñ 20-nde Aliye Degermenci haber etkenine köre, bölükte hastalarnen tolu olğanı sebebinden, onıñ qocasını reanimatsiyadan alıp pulmonologiya bölüginiñ koridorına yerleştirgenler. Daa soñra Degermenci SİZOğa qaytarılıp ketirildi.
Noyabrniñ 23-nde kündüz Aqmescitte küç idaresiniñ hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından para talap etüvde qabaatlana. Rusiye küç idaresiniñ hadimleri tarafından tutuluvlar esnasında qırımtatar milliy areketiniñ veteranı Veciye Kaşka yaramağan edi. Daa soñra qadın vefat etti.
Noyabrniñ 24-nde Rusiyeniñ nezaretindeki Aqmescit Kiyev rayon mahkemesi tutulıp alınğan qırımtatar faallerini 2018 senesi yanvarniñ 15-ne qadar apiste qaldırğan edi.
