Fevralniñ 1-nde Aqmescitte uçucı, qırımtatar halqınıñ erbabı Amet-Han Sultannıñ elâk olğan künü miting ötkerildi. Meydanda Qırımnıñ Rus cemiyeti, Krımpatriottesntr, sovet zabitleri Şurası ve şeet sakinleri toplaştı. Bu aqta fevralniñ 1-nde Qırım.Aqiqatınıñ muhbiri haber ete.
Olar ellerinde öz teşkilâtlarınıñ şiarları, Rusiye ve Qırımtatar bayraqlarını tuta ediler. İştirakçlerden biri elinde birinci saifesinde Amet-Han Sultannıñ sureti olğan qırımtatar gazetyasını tutqan eken. Qırım memurları birinci sırada elinde qaranfil tutıp turğanlar.
«O, qırımtatar halqınıñ qaramanı. O, bizim qaramanımız, Sovetler Birligi qaramanı, onıñ içün bizler o deşet cenk içün öz ayatını feda etkenlerni unutmamalımız», – dep qayd etti Kreml nezaretindeki Aqmescit memuriyetiniñ yolbaşçısı İgor Lukaşev.
«Biz böyle qaramannen ğururlanamız. Ondan örnek almalı. Epimiz ve gençler de», – dedi mitingge kelgen Qırım sakinlerinden biri.
Aqmescit rayonınıñ imamı Raim Gafarov tedbirni duanen başladı. Qırımdaki Rus cemaatı adına miting iştirakçisi Amet-Han Sultanğa bağışlanğan şiir ouğan soñ, uçucısnıñ hatırasına bağışlanğan türkü yañğıradı.
Tedbir teşkilâtçılar sükünet daqqasından soñ, Amet-Han Sultan hatıra tahtası ögüne çiçek qoydılar.
Qırımtatar halqınıñ erbabı, Sovetler Birliginiñ eki defa qaramanı uçucı Amet-Han Sultan 20 oktâbr 1920 künü Alupkada dünyağa kele. Babası – lak milletinden (doğma Dağıstandaki Tsovkra-1 avulından), anası – qırımtatarıdır. Ana-babası tarafından Amet-Han Sultannı qırımtatarları da, Dağıstanlılar da öz milliy qaramanı dep qabul eteler. Amet-Han Sultan 603 cenkâver uçuş yapıp, şahsen özü 30 ve grupp erkanında 19 lüftvaffeniñ uçağını urup tüşüre. Uçuş vaqtında uçucı tahminen 100 uçaqnıñ çeşitini ögrene, uçuşları ise 4237 saatni teşkil ete.
Amet-Han Sultan Tu-16 uçma laboratoriyasında deñeme uçuşında elâk ola. O, Moskva Novodeviçye mezarlığında defn etildi. Dağıstannıñ paytahtı Mahaçkala şeerinde halqara avalimanına onıñ adı berilgendir.
