Tevqif etilgen qırımtatarğa muvaqqat tutuluv izolâtorına aqrabalarını yiberdiler (video)

Qırımda ilhaqtan soñki memuriy tevqifler devam etken vaqıt içinde birinci kere aqrabalarğa muvaqqat tutuluv izolâtorında (MTİ) tevqif etilgen faaliyetçi Enver Kroşnen körüşmege izin berdiler. 2012 senesinde içtimaiy ağda derc etken malümat içün 10 künge tevqif etilgen Enver Kroşnıñ apayı ve qardaşı Aqmescitteki MTİniñ territoriyasında onıñnen bir saatlıq körüşüvge izin aldılar. Ekrem Kroş, ağasınıñ özüni yahşı is etkenini, oña tazyiq etilmegenini söyledi. Aynı zamanda Enver Kroşnıñ cemiyet qorçalayıcısı Lütfiye Zodiyevağa, Rusiye qanunlarına muvafıq olaraq resmiyleştirilgen vekâletnamesiniñ olmağanına sıltap, imayesi altında bulunğan şahısnen körüşmege izin bermediler.