Yanvarniñ 29-nda Kyivniñ Desnânskıy ve Darnıtskıy rayon mahkemeleri devletke hainlikten şübheli tanılğan sabıq Aqyar şeer şurası deputatı ve sabıq QMC Yuqarı Radası deputatınıñ işleri boyunca oturışuvlarını başqa künlerge avuştırdılar. Bunı yanvarniñ 29-nda Qırm.Aqiqat içün bergen izaatta muessiseniñ matbuat kâtibi Tetâna Tıhonçık bildirdi.
Tıhonçık: «Mahkeme sabıq Aqyar şeer şurası deputatınıñ işi boyunca advokatnıñ kelmegeni sebebi ile oturışuvnı yanvarniñ 28-ne avuştırıldı. QMC Yuqarı Radası deputatı boyunca da oturışuv advokatnıñ kelmegeni munasebetinen başqa künge avuştırıldı. İşniñ baqıluv kününi daa soñra bildirecekler», – dedi.
Sabıq Qırım deputatlarını Ukraina cinaiy kodeksiniñ 111-nci maddesi birinci qısmı boyunca devletke hainlikte qabaatlaylar. Muessisede, işleri baqılacaq şübhelilerniñ adlarını bildirmediler.
2014 senesi martnıñ 16-sında Qırım ve Aqyar şeeri territoriyasında yarımadanıñ statusına dair dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Martnıñ 18-nde Rusiye prezidenti Vladimir Putin Qırımnıñ Rusiyege «qoşulğanını» ilân etti.
Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
