Yanvarniñ 31-nde Avropa parlamenti binasında Qırımnıñ Rusiye tarafından ilhaq etilüvi meselelerine bağışlanğan «İşğalniñ 4 yılı – Qırımğa ve qırımtatarlarğa qol tutmaq çareleri» konferentsiyasınıñ ötkerilmesi planlaştırılla. Bunı yanvarniñ 29-nda Qırım.Aqiqat içün bergen izaatlarda «Qırım.SOS» cemiyet teşkilâtınıñ koordinatorı Tamila Taşeva söyledi.
Taşeva: «Konferentsiyada bizler daa 2017 seneside Qırım faaliyetçileri ve (Avopa parlamentiniñ deputatı – QA) Rebekka Harms ile muzakere etken muayyen meseleler baqılacaq. Er şey Mustafa Cemilevniñ kiriş qısmından başlaycaq. Ondan soñ ise Qırımdan kelgen musafirlerimiz (Ahtem Çiygoz ve İlmi Umerov – QA) zemaneviy problemler ve tendentsiyalar, Qırımnıñ kelecegi aqqında aytacaqlar. Ondan ğayrı, Qırımnı deokkupatsiya etmek içün halqara toplulıq tarafından neler yapılmaq kerek meselesi muzakere etilecek», – dedi.
Konferentsiyadan soñ qırımtatar milliy areketiniñ lideri Mustafa Cemilev aqqında «Mustafa» vesiqalı filmi kösterilecek, dey Taşeva.
Taşevanıñ aytqanına köre, tedbir Qırım boyunca «rey bergen ve qararlar çıqarğan» Avropa parlametiniñ azaları içün teşkil etildi. Onı «QırımSOS» ve İnsan aqları boyunca halqara ortaqlıq cemiyet teşkilâtları ile üç Avropa parlament deputatı – Rebekka Harms, Pâtras Auştrâviçüs ve Yaromir Ştetina teşkil ettiler.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
