Link açıqlığı

Saatnıñ esas haberi

Odessanıñ bir şahsiy mektebinde qırımtatar tilini ögretip başladılar


Odessadaki şahsiy mektepleriniñ birinde qırımtatar tilini ögretip başladılar. Bunı Qırım.Aqiqatqa mektep müdiriniñ oquv işleri boyunca muavini Abdurrahim Anafiyev bildirdi. Onıñ aytqanına köre, dersler aftada eki kere yapıla. Qırımtatar tilini oqutmaq içün birinci ve ekinci sınıflarnıñ talebelerinden eki grup tizildi. Derslerni Qırım industrial-pedagogika universitetiniñ mezunı, qırımtatar ve rus tilleri ocası oquta.

Anafiyev: «Bizde program ortaqlaşıp tizile, biz kontseptsiyanı beraber işlep çıqamız. Bizim maqsadımız, ilk nevbette, qonuşma tili, balalarnıñ canlı qırımtatar tilinde laf ete ve anlay bilmeleri. Ondan soñ grammatika esasları qoşulacaq», – dedi.

O, qırımtatar tilini ögretmek içün ocanıñ Qırımdan ketirgen derslikleri qullanıla, dep qayd etti. Derslerge yalıñız qırımtatar milletine ait balalar degil, aynı zamanda diger halqlarğa ait balalar da qatnay.

Mektep hadimi: «Mektbimizde böyle yanaşuv bar: sınıfta bir de bir milletke ait beşten ziyade talebe olsa, biz olarğa tuvğan tillerini ögremeleri içün imkân beremiz. Qırımtatar tili derslerine qatnamaq istegini bildirgenler yalıñız qırımatatarlar degil edi. Bizde qırımtatar tilini ögrenmek istegini bildirgen türkiy tillerde laf etken halqlar grubu, Qazan ve başqort tatarları bar», – dedi.

Oquv yurtunıñ memuriyetinde, «Hacibey» mektebinde ondan ğayrı ukrain, rus, arap ve ingliz tilleri ögretile, dep qayd ettiler.

Ukrainanıñ qıtadaki qısmında qırımtatar tili qırımtatarlar toplu surette yaşağan Herson vilâyeti Geniçesk rayonınıñ bir sıra mekteplerinde oqutıla. Novoalekseyevka qasabasında bütün fenler qırımtatar tilinde ögretilgen Ukrainada yekâne umumtasil mektep çalışmaqta.

XS
SM
MD
LG