Yanvarniñ 25, cumaaqşamı künü saba saatlarında Kreml nezaretindeki Qırım küç idaresiniñ hadimleri yarımadanıñ Canköy sakini Enver Kroş ve Seitler rayonı Seitler Vaqıf köyüniñ sakini Ebazer İslâmovnıñ evlerinde tintüv yaptılar.
«Qırım birdemligi» cemaat teşkilâtınıñ malümatına köre, eki adamnı da yerli rusiyeli politsiya bölüklerine alıp ketkenler.
Faal Server Mustafayev Qırım.Aqiqatqa ikâye etip bergenine köre, qırımlılarnıñ evindeki tintüvler ictimaiy ağlarda derc etilgen malümatlarnen alâqalı eken.
Angi bir ictimaiy ağlar ve derc etilgen malümatlar aqqında söz yürsetilgeni belli degilServer Mustafayev
«Operativ tedbirler keçirilgen maalde şahıslarnıñ evlerinde bulunğan aqrabaları aytqanına köre, küç idaresiniñ hadimleri bu adamlar ictimaiy ağlarda derc etilgen malümatlar esasındaki qararğa binaen areket etkenleri aqqında aytqan ekenler. Angi bir ictimaiy ağlar ve derc etilgen malümat aqqında söz yürsetilgeni belli degil», – dep ikâye etti Mustafayev.
Uquqimayecisi Lütfiye Zudiyeva haber etkenine köre, Enver Kroşnı rayon politsiya idaresinden Kreml nezaretindeki yerli mahkemege alıp ketkenler. Onıñ telefon, planşet ve noutbukını çekip alğanlar.
«Rusiyeli küç idaresiniñ hadimleri «Krepost» operatsiyasını ilân etkenler: üç saat devamında soy-sopları bile, aqrabalarnıñ arizasını qayd ettirmek içün kantselâriyağa (politsiya rayon bölüginde –QA) kirip olmağanlar. Al-azırda onı beyaz «Gazel» içine mindirip, mahkemege alıp ketemiz degenler», – dep ikâye ete o.
Onıñ sözlerine köre, Kroşnı alıp ketkenlerinden soñ, rusiyeli küç idaresiniñ hadimleri operatsiyasını yekünlep çekilgenler.
Enver Kroş Rusiye kodeksiniñ 20.3 maddesi 1-nci qısmı (ekstrimistik teşkilâtlarnıñ atributları ya da simvolikasını propaganda etüv ya da açıq şekilde numayiş etüv) boyunca memuriy uquq bozuvında qabaatlana. Mahkeme onı 10 künge tevqif etti.
Yanvarniñ 25-nde tutulıp alınğan ekinci Qırım musulmanını da aynı madde boyunca qabaatlana. Polis rayon bölüginden rayon mahkemesine ketirilgen soñ, onıñ işi baqılğan maalde bina ögüne «acele yardım» çağırıla. Daa soñra imayeniñ ricasınen mahkeme işke miyniñ magnit-rezonans tomografiysınıñ (MRT) neticelerini ilâve ete.
Qırımlı advokat Emil Kurbedinovnıñ bergen malümatına köre, Enver Kroş 2015 senesi dekabr ayında rusiyeli küç idaresiniñ hadimlerinen körüşip, çekiştirüvlerge tabi tutulğan birisidir.
FSB hadimleri Enverni işbirlik yapmağa zorlağanlar. Enver olarnen işbirligi yapmaycağını añlağan soñ, onı çekiştirilmesine emir bergenlerEmil Kurbedinov
«Onı yalan yolunen politsiya bölügine kirsetkenler. Anda artıq FSB hadimleri bekley eken ve onı işbirlik yapmağa zorlağanlar. Enver olarnen işbirligi yapmaycağını añlağan soñ, yerli politsiya hadimlerine onı qıynamasını emir etkenler. Olar Enverniñ başına çuval keysetip, onı bir yerlerge alıp kirerek, qıynağanlar! Uzun vaqıt ve avesliknen qıynağanlar. Enver sağ qalıp, olıp keçkenler ikâye etken, şu cumleden KHV da. O, soñki künlergece barışıqsever küreşini devam etip, Qırımnıñ siyasiy ve ictimaiy ayatında faal iştirak etmekte! O, bir kişilik piketke de çıqqan edi!» – dep yaza Emil Kurbedinov öz Facebook saifesinde.
İmayeci qayd etkenine köre, Kroş çekiştirüvler aqqında halq ögünde ikâye etken soñ, qabaatlılarnı cezalamaq içün «rusiyeli küç idarelerinden iç birisi parmağını bile qıbırdatmağan edi».
«Ancaq söz internetteki ictimaiy ağlarda kimsege zarar ketirmeycek bir paylâşuv aqqında ketkende, küç idaresiniñ hadimleri internet qoruyıcısı ve ulu monitorlar sıfatında aman yetişip keleler!» – dep qayd ete Kurbedinıov.
Rusiyeli küç idareleriniñ saytlarında tintüvnen alâqalı malümat yoq.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
