Yanvarniñ 25-ndeki vaziyetke köre, Qırım Muhtar Cumhuriyeti prokuraturası, deñiz gemileriniñ Ukraina tarafından qapatılğan Qırım limanlarına 665 kere kirgenini qayd etti. Bunı yanvarniñ 25-nde Qırım.Aqiqatqa muessiseniñ matbuat kâtibi Tettâna Tıhonçık bildirdi.
Onıñ aytqanına köre, QMC prokuraturası gemilerniñ kirüv adiselerini qayd etmege ve tahqiqat areketlerini yapmağa devam ete.
2014 senesiniñ iyülinden başlap, Ukraina akimiyeti Rusiye tarafından ilhaq etilgen Qırımdaki bütün limanlarınıñ çalışqanını resmen toqtattı. Yarımadanıñ limanları halqara deñiz naqliyatı içün qapaldı.
2014 senesi dekabrinde Avropa şirketlerine Qırımda turizm saasında hizmet köstermek ve sefer gemilerine yarımadanıñ limanlarına kirmek yasaq etildi. Ukraina Nazirler kabineti, Qırım limanlarını çetel gemileri içün açıq limanlar cedvelinden 2015 senesinde çıqarıp taşladı.
Daa evel Ukraina Devlet sıñır hizmeti, 2014 senesi martından başlap, Ukraina qanunlarını bozğan ve ilhaq etilgen Qırımnıñ limanlarına kirgen 652 çetel gemini közetkenini bildirdi.
