Link açıqlığı

Saatnıñ esas haberi

Rusiye arbiyleri 2014 senesi Qırımnı tolusınen nezaret etmek içün ukraina arbiy qısımlarını blok etken ediler – Çubarov


Rusiye silâlı askerleri Aqmescitte, 2014 senesi
Rusiye silâlı askerleri Aqmescitte, 2014 senesi

Rusiye arbiyleri 2014 senesi mart ayınıñ başında yarımadanı bütünley nezaret etmek içün, öz komandanlığı buyruğına binaen ukrain arbiy qısımlarını blok etken ediler. Bunı yanvarniñ 25-nde qırımtatar Milliy Meclisiniñ reisi Refat Çubarov, sabıq prezident Viktor Yanukoviçniñ devlet hainliginen bağlı mahkeme otırışuvında beyan etti.

«Eger bütün vaqialarnı birleştirecek olsaq, Qırımnı bütünley nezaret etmek kerek edi degen vazife berilgeni belli ola. Bu – Rusiyeniñ doğrudan-doğru yapqan tecavuzı edi. Matviyenko (Rusiye parlamenti üst palatasınıñ reisi Valentina Matviyenko –QA) rusiyeli insanlarnıñ qanı töküle degen edi. O, 60 faizni teşkil etken ruslarnı taşlap olamammız dep iddia etken edi. Vaziyet böyle kerginleştirildi. 2014 senesinece bu vaqialar olğan vaqıtqace etnik esasta asla bir çatışma olmağan edi», - dep bildire Refat Çubarovnıñ sözlerini mahkeme zalından metin yayınlavı yapqan Сensor.net muarrirligi.

2017 senesi iyün ayınıñ soñunda mahkeme sabıq prezident Viktor Yanukoviçniñ devlet hainliginen bağlı işni ğıyaben baqmağa başlay. Bundan soñ Yanukoviçniñ advokatları bu mahkemede iştirak etmekni red eteler ve oña bir qaç sefer yañı devlet imayecisi tayin etile.

Yanukoviç Ukrainadaki, hususan 2013 senesi noyabr ayından başlap, 2014 senesi fevral ayına qadar salahiyetini aşuv, Maydandaki faallerniñ kütleviy öldirilüvi ve 2010 senesi devlet iqtidarını qolğa keçirgeninen bağlı bir sıra cinaiy işlerniñ figurantıdır.

Maydanda narazılıq bildirgenlerni atıp öldürgen soñ, Ukrainanıñ sabıq prezidenti Rusiyege qaçıp keterek, qabaatlavlarnı red ete.

Halqara teşkilâtlar Qırımnıñ istilâsı qanunsız olğanını tanıp, Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.

XS
SM
MD
LG