Rusiye arbiyleri 2014 senesi fevralniñ 28-nde Qırım ilhaq etilgen vaqıtta, Qırım MC Yuqarı Şurasınıñ toplaşuvı esnasında Qırım deputatlarını kontrol ete ediler, dep bildirdi qırımtatar Milliy Meclisiniñ reisi Refat Çubarov, sabıq prezident Viktor Yanukoviçniñ devlet hainliginen bağlı mahkeme otırışuvında. Bu aqta mahkeme zalından UNİAN muhbiri haber ete.
Haber etilgenine köre, Çubarov 2014 senesi fevralniñ 28-nde deputatlar saat 15:00 tayinlengen Qırım MC Yuqarı Şurasınıñ sessiyasına toplaşqanları aqqında ikâye etken. Deputat ve jurnalistlerniñ cep telefonlarını arbiyler tutıp alğan.
Milliy Meclis reisiniñ sözlerine köre, o Qırım nazirler Şurasınıñ reisi Anatoliy Mogilöv ne yerde olğanını sorap, Mogilöv istifa etkenini eşitken. Arbiyler binağa kirsetken Qırım deputatları ise, yañı reis olaraq Sergey Aksönovnı saylâğan ekenler.
Aynı zamanda Çubarov, 2014 senesi fevralniñ 28-nde aqşam yerli telekanallar Qırımda nazirler Şurasınıñ yañı reisi olaraq Aksönov saylânğanı aqqında haber etken, martnıñ 1-nde ise, Aksönov Rusiye prezidenti Vladimir Putinge muracaat eterek, «Qırımnı qurtarmağa rica etken».
2017 senesi iyün ayınıñ soñunda mahkeme sabıq prezident Viktor Yanukoviçniñ devlet hainliginen bağlı işni ğıyaben baqmağa başlay. Bundan soñ Yanukoviçniñ advokatları bu mahkemede iştirak etmekni red eteler ve oña bir qaç sefer yañı devlet imayecisi tayin etile.
Yanukoviç Ukrainadaki, hususan 2013 senesi noyabr ayından başlap, 2014 senesi fevral ayına qadar salahiyetini aşuv, Maydandaki faallerniñ kütleviy öldirilüvi ve 2010 senesi devlet iqtidarını qolğa keçirgeninen bağlı bir sıra cinaiy işlerniñ figurantıdır.
Maydanda narazılıq bildirgenlerni atıp öldürgen soñ, Ukrainanıñ sabıq prezidenti Rusiyege qaçıp keterek, qabaatlavlarnı red ete.
Halqara teşkilâtlar Qırımnıñ istilâsı qanunsız olğanını tanıp, Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
