Link açıqlığı

Saatnıñ esas haberi

Uquqçı: Qırım sakinlerinde Rusiye pasportı olmasınıñ iç bir uquqiy aqibeti yoq


İlhaq etilgen Qırım ve Ukrainanıñ qıta qısmı arasında keçken memuriy sıñırda Rusiye pasportınıñ tapılması, Qırım sakinleri içün iç bir uquqiy aqibet taşımamaqtadır, dep bildire Qırım.Aqiqat Radiosı efirinde İnsan aqları boyunca Ukraina Helsinki biriliginiñ uquqçısı Anna Rassamahina.

«Eger memuriy sıñırda yanıñızda Rusiye pasportı tapılsa, bunıñ iç bir uquqiy aqibeti olmaz. Ukraina qanıunında, Qırımda berilgen Rusiye vatandaşlığı mecburiy olğanı ve kerçek dep tanılmağanı aqqında yazılmaqta. Yani böyleliknen bu çift vatandaşlıq olaraq tanılmay», – dep ikâye ete uquqçı.

Onıñ szölerine köre, ukrain memurları «Qırım sakinlerinden vesiqalar azırlanması içün köçkeni aqqında malümatname isteyerek, eñ çoq zarar ketirgen ve esassız manialar çıqaralar».

«Biz diktofonnı açıp, böyle red cevaplarnı qayd etilmesini tevsiye etemiz», – dep qayd etti Rassamahina.

Devlet sıñırında yerleşken keçiş noqtalarında biometrik qayd sisteması yanvarniñ 1-nden itibaren çalışıp başladı. Sıñırda çalışqan nezaretniñ yañı sisteması «migratsion telüke» cedvelindeki cemi 70 devlet vatandaşı, şu cumleden, Rusiyenen alâğalı.

Biometrik malümat nezareti Qırımda yaşağan Ukraina vatandaşlarına tesir etmeycek, dep bidirdi Ukraina devlet sıñır hızmeti.

Ukraina tarafından yüksek telüke teşkil etken devletlerden, şu cumleden Rusiyeden kelgen vatandaşlar içün mecburiy biometrik nezaret kirsetilgeninden soñ, Qırım memuriy sıñırından keçiş em ID-karta, em de 1994 senesi berilip başlanğan pasport vastasınen yapılacaq.

2014 senesi Qırım Rusiye tarafından ilhaq etilgen soñ Ukraina qıta qısmınen yarımada arasında resmiy olaraq - memuriy, aslında - aqiqiy bir sıñır peyda oldı. Memuriy sıñırda «Kalançak», «Çonğar» ve «Çaplınka» olaraq üç kiriş-çıqış noqtası çalışmaqta.

XS
SM
MD
LG