Kremlniñ kontroli altında bulunğan Tsentralnıy rayonı mahkemesi «Fevral 26 işi» figurantları Mustafa Degermenci ve Ali Asanovğa ev apisi muddetini eki ayğa uzattı. Bunı yanvarniñ 22-sinde Qırım.Aqiqat muhbiri bildire.
Degermenci ve Asanov 2018 senesi aprelniñ 7-sine qadar ev apisinde qaldırıldılar.
Qorçalav tarafı ev apisiniñ uzatılmasına qarşı çıqtı. Şu cümleden, Mustafa Degermenci, işniñ «deliller olmağanı sebebinden yerinden qıbırdamağanı açıq-aydın körüne», dedi. Onıñ advokatı Aleksandr Solodkov, mahkeme qabaatlav tarafınıñ bütün delillerini endi ögrendi ve büdjet paralarını iqtisat etmek içün sıñırlav tedbirini ev apisinden, bulunğan yerini terk etmemek mecburiyetine deñiştirmek kerek, dep qayd etti. Diger advokatlar da bu fikirge qol tuttı. Olar ev apisini uzatmaq içün esasnıñ olmağanını, muhakeme etilgenlerniñ qorantadaki vaziyetlerini ve işniñ isbatlanmağanını qayd ettiler.
«Fevral 26 işi» boyunca nevbetteki oturışuvda prokuror, Rusiye «Ekstremizmge qarşılıq kösterüv merkezi»niñ hadimleri tarafından azırlanğan raportlarnıñ işke ilâve etilmesini istedi. Bu raportlarğa binaen zarar körgenler İvkin ve Şlâgin Qırım territoriyasında bulunmaylar. Advokatlar, bu vesiqalarnıñ talaplarğa uymağanını ve, ondan ğayrı, raportlarda bu şahıslarnıñ Qırım sıñırları tışına ketkenleri aqqında qatiy şekilde aytılmağanını qayd ettiler.
Ondan ğayrı, advokatlarnıñ aytqanına köre, raportlardan birinde zarar körgenler ile aqrabalarınıñ soyadları bir-birinen qarıştırıldı. Advokat, bundan da başqa, teşkerüv operativ hadimleri tarafından yapıldı, lâkin bu materiallardan gizliliginiñ alıp taşlanması aqqında emir mahkemege berilmedi, dep qayd etti. Akem, prokurornıñ bu materiallarnı işke ilâve etmek ricasını red etti.
Prokuror mahkemeni, işniñ materiallarını ögrenmek ve Ahtem Çiygozğa qarşı mahkeme qararınıñ qanuniy quvet alması munasebetinen, ihtimal ki, yañı delillerniñ berilmesi içün yanvarniñ 26-sına qadar teneffüs ilân etmege rica etti.
2015 senesinde bir grup qırımtatar faaliyetçilerge qarşı 2014 senesi fevral 26-da Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingniñ iştirakçilerine qarşı mahkeme başlandı. Olar kütleviy qarışıqlıqlarda iştirak etkenlerinde qabaatlanalar.
Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti 2017 senesi oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
