Ukraina Tış işleri nazirligi, Ukraina UNESCOnı ilhaq etilgen Bağçasarayda bulunğan Han sarayınıñ muafaza etilmesi içün çareler körmege davet ete, dep bildire.
Muessiseniñ malümatına köre, Bağçasaraydaki Han sarayı etrafında kritik vaziyet Ukrainanıñ UNESKO işleri boyunca milliy komissiyasınıñ yanvar 19-da Tış işleri nazirliginde ötkerilgen mahsus oturışuvında baş mevzu oldı.
Oturışuvnıñ iştirakçileri, ilhaq etilgen Qırımnıñ territoriyasında medeniyet saasındaki vaziyet «teren raatsızlıq doğurğanı kibi, asılında Qırım yarımadasındaki unikal multikulturalizmge kütleviy, yahşı planlaştırılğan ücüm etken işğalci akimiyetniñ areketlerine qarşı ğadap doğura», dep tesbit ettiler.
Bildirüvde: «Ukrainanıñ milliy emiyetke malik abidesi ve qırımtatar halqına ait milliy mirasnıñ ayırılmaz qısmı olğan Bağçasaraydaki Han sarayınıñ territoriyasında yapılğan ve daa 2003 senesinde UNESCOnıñ Dünya mirası cedveline kirsetmek içün Azırlıq cedveline kirsetilgen bu abideniñ tarihiy ve medeniy qıymeti içün kerçek bir ğayıp etüv telükesini doğurğan «restavratsiya işleri» bunıñ kibi tecavuzkâr areketler aqqında pek açıq surette şaatlıq eteler», – denile.
Bağçasaraydaki Han sarayında Qırımnıñ Rusiyege tabi akimiyetiniñ teşebbüsinen yapılğan qazağa qarşı işler devam ete. Şaatlarnıñ bildirgenine köre, saraynıñ baş binası etrafında ağır demir karkas qurula. Onı üstten qoruma damınen örtecek olalar.
Mutehassıslar, konstruktsiyanıñ ağırlığından topraq çökmek mümkün, dep qorqa. Ondan ğayrı, işçiler mezar sanduqaları ve caminiñ kalligrafik yazılarını muafaza etmek içün mahsus qorumalar qoymadı. Qadimiy ağaç pekitmeleri üstüne ise asıl da beton töktiler.
Daa evel Qırım adliyecileri ve advokatları Bağçasarayda Han sarayını qorçalav boyunca uquqiy kampaniyanı başlamaq niyetinde olğanlarını bildirdiler.
