Link açıqlığı

Saatnıñ esas haberi

QMC prokuraturası «özüni mudafaa»nıñ bölüklerinden biri komandanına şübhe bildirdi


Yarımadanıñ ilhaq etilmesi esnasında Aqmescitte ava limanınıñ qamaçavında iştirak etken Qırımnıñ «özüni mudafaa»sı dörtünci bölügi yolbaşçısına, Ukraina Cinaiy kodeksiniñ 260-ncı maddesiniñ 5-nci qısmı ve 110-ncı maddesiniñ 2-nci qısmında qayd etilgen cinaiy areketlerni yapqanında şübheli tanılğanı bildirildi.

Qırım Muhtar Cumhuriyeti prokuraturasınıñ matbuat hizmeti yanvarniñ 19-nda bildirgeni kibi, «Ukraina İçki işler nazirligi hadimlerini birleştirgen Cumhuriyet zenaatdaşlar ittifaqınıñ (profsoyuz) sabıq rehberi 2014 senesi fevralniñ 23-nde profsoyuznıñ nevbetten tış oturışuvını topladı. Onda «Qırımnıñ Özüni mudafaası» silâlı birleşmesi meydanğa ketirildi.

Nezaret muessisesinde: «Yanvarniñ 17-sinde mezkür şahısqa şübhe altında bulunğanı bildirildi, ve onıñ qıdırılğanını ilân etüv boyunca vesiqalar azırlandı», – dep añlattılar.

Prokuratura şübheli tanılğan şahısnıñ adını bildirmedi. Onıñ tarafından bu hususta açıq menbalarda berilgen izaatlar yoq.

Odessanıñ Primorskiy rayonı mahkemesi dekabrniñ 18-nde Sattarovnı tevqif etti.

Qırımnıñ «özüni mudafaa»sı yarımadanıñ işğali arfesinde peyda oldı ve yarımadanıñ Rusiye tarafından ilhaqına yardım etti. 2014 senesi iyünniñ 11-nde Kremlniñ kontroli altında bulunğan Qırım parlamenti, munasip qanunnı qabul etip, bu teşkilâtnı qanuniyleştirdi.

Aq-uquq qorçalayıcıları bu silâlı birleşmeniñ bir sıra cinayetlerge alâqası olğanını defalarca bildirdi. Qırımda bu cinayetlerni yapqanlar ale daa tapılmadı.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG