Çehiya tış işleri naziri Martin Stropnitskiy Praga tarafından Ukrainanıñ topraq bütünligi ve suverenitetine kösterilgen qol tutuvını tasdiqlay. Bunı yanvarniñ 16-sında o, Ukraina tış işleri naziri Pavlo Klimkinnen telefon vastasınen suhbetleşkende söyledi.
Çehiya TİN resmiy saifesi bildirgeni kibi, Stropnitskiy Klimkinnen Qırımda ve Ukrainanıñ şarqında mevcut olğan vaziyetni, em de islâhlar inkişafı meselesini muzakere etti.
Nazirlik Stropnitskiyniñ sözlerini: «Biz Qırımnıñ qanunsız ilhaqı halqara uquqnıñ ciddiy bir bozuluvı dep sayamız», – şeklinde naqil ete.
Ondan ğayrı, Çehiyanıñ tış siyaseti muessisesiniñ yolbaşçısı Ukraina meslekdeşi ile devlette siyasiy ve iqtisadiy islâhlarnıñ ketişatı, korruptsiyağa qarşı küreş ve Avropa Birligi ile assotsiatsiya boyunca muqaveleniñ ömürge keçirilmesiniñ ketişatını muzakere etti.
Çehiya Tış işleri nazirliginde ayrıca qayd etilgenine köre, Stropnitskiy Çehiyanıñ Ukrainadaki islâhlarğa ve «hususan halqara koordinator olaraq tasil saasınaki» islâhlarğa faal surette qol tutuvnı devam etmege azır olğanını tasdiqladı. Ondan ğayrı nazir, çeh iş adamları ve investorlarınıñ menfaatına doğru kelgen «Ukraina iqtisadiyatınıñ stabil alğa kelgenine yüksek qıymet kesti».
Çehiyada yanvar 12-13 künlerinde prezident saylavında rey berüv keçti. Namzetlerden iç birisi umumen berilgen reylerniñ 50 faizinden ziyadesini almadı. Ekinci basamaqqa şimdiki prezident Zeman Çehiya İlimler akademiyasınıñ sabıq rehberi ve al-azırda Çehiyanıñ himiyeviy muendislik cemiyetiniñ reisi, alim İrji Dragoş çıqtılar.
Zeman Avropağa menfiy ve Rusiyege musbet baqışları ve Vladimir Putinnen eyi munasebetleri ile belli.
