Qırım Muhtar Cumhuriyeti prokuraturası Qırım Muhtar Cumhuriyeti Yuqarı Radasınıñ 7 sabıq deputatınıñ qıdırılmasını ilân etti.
Yanvarniñ 17-sinde nezaret etici muessiseniñ bildirgenine köre, Qırım parlamentiniñ sabıq deputatları «Rusiye ve onıñ temsilcileri tarafından Ukrainağa qarşı ziyankâr areketlerniñ yapılmasına yardım kösterdiler».
Prokuraturanıñ bildirüvinde: «Qırım Muhtar Cumhuriyeti territoriyasınıñ Rusiye Federatsiyasına kirmesi ve bundan soñki yarımadanıñ işğali bu yardım kösterilüviniñ neticesi oldı», – denile.
Muessiseniñ malümatına köre, al-azırda «apiste tutuluv şeklinde sıñırlav tedbiriniñ tatbiq etilmesine dair arzualnıñ baqılmasında iştirak etmeleri maqsadınen (deputatlarnıñ – QA) yaqalanuvları içün izin berilmesi aqqında muracaat azırlana».
2017 senesiniñ dekabr ayındaki vaziyetke köre, QMC Yuqarı Radasınıñ 75 sabıq deputatı deputatınıñ qıdırılması ilân etildi.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etildi. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
