Ukraina Silâlı Quvetleri Baş ştabınıñ yolbaşçısı Viktor Mujenko, NATO Arbiy komitetiniñ oturışuvında Türkiye Ukrainağa «pek ziyade» qol tuttı, dep bildirdi.
Mujenko: «Türkiye bizge, cümleden, emekdaşlığımıznıñ yañı yönelişleri olğan hümanitar ve konsultativ yardım, Silâlı quvetlerniñ logistikasını meydanğa ketirüv ve Ukrainağa maddiy yardım berüv meseleleri boyunca pek ziyade qol tuttı», – dedi.
O, NATO baş ştabları reisleri tarafından Ukrainadaki ortaqlarına qarşı kritik çıqışlar ya da qaydlarnıñ yapılmağanını, aksine, Arbiy komitetiniñ NATO-Ukraina formatındaki oturışuvnıñ er bir iştirakçisi tarafından Ukrainanıñ topraq bütünligine pek qaviy qol tutuvnıñ ifade etilgenini ilâve etti.
Onıñ aytqanına köre, Ukrainanıñ «Javelin» tipinde tanklarğa qarşı raketa sistemlerini almaycağına dair izaatlar kerçekke zıt kele.
Baş ştabınıñ yolbaşçısı, Ukrainanıñ arbiy hadimleri tarafından bu çeşit silâlarnıñ qullanılmasına azırlıq yapılğanı kibi, bu silâlar ile vastasız şekilde silâlandırılacaq arbiy strukturalarnıñ meydanğa ketirilmesi boyunca teşkiliy tedbirler endi yapıla, dep qayd etti.
2017 senesi dekabrniñ soñunda AQŞ prezidenti Donald Trampnıñ memuriyeti Ukrainağa öldürici silânıñ bir qaç tipini satmaq içün litsenziyanı tasdiqladı. Bundan soñ Amerikanıñ kütleviy haber vastalarında, cümleden, 35 fırlatıcı tertibatı ile 210 raketası olaraq «Javelin» raketa kompleksleri bahis mevzusı olğanları aqqında bildirüvler peyda oldı.
