Kremlniñ kontroli altında bulunğan Qırım Yuqarı mahkemesi yanvarniñ 17-sinde Bağçasaraydaki «Hizb ut-Tahrir işi»niñ üç figurantı, Ernes Ametov, Marlen Asanov ve Server Zekiryayevniñ tevqif etilgenlerine qarşı appelâtsiyanı red etti. Bunı Qırım.Aqiqatqa advokat Emil Kurbedinov bildirdi.
Kurbedinov: «Oturışuvnıñ neticesinde bizim apellâtsion şikâyetlerimiz boyunca musbet qarar berilmedi. Oturışuv qapalı rejimde keçti. Bunıñ sebebi bizge belli degil. Bizge bu hususta iç bir vesiqa berilmedi, ve biz bu qararnı qanunsız sayamız», – dedi.
Onıñ aytqanına köre, ondan ğayrı, mahkeme oturışuv esnasında qorçalav tarafınıñ bir qaç ricasını red etti.
Kurbedinov: «Misal olaraq, advokat Aleksey Ladin birinci maqam mahkemesiniñ qararında pek qaba bozuluvlar ve hatalar olğanını bildirdi. Lâkin mahkeme buña emiyet bermedi», – dep ilâve etti.
Daa evel Aqmescitteki Kyiv rayonı mahkemesi daa üç «Hizb ut-Tahrir işi» figurantı – Ernes Ametov, Marlen Asanov ve Server Zekiryayevqa apis müddetini uzattı. Böylelikle olar martnıñ 9-na qadar apiste qalacaqlar.
Oktâbrniñ 11-nde Qırımda Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tevqif etti. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, taqip etilüvlerniñ diniy alâmetine köre yapılğanını tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleri olğanını qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
