Link açıqlığı

Saatnıñ esas haberi

Ukraina tış işleri naziri: «Baluhnı aqsız yerge mahküm etkenler cezalanacaq»


Ukraina tış işleri naziri Pavlo Klimkin
Ukraina tış işleri naziri Pavlo Klimkin

Ukraina tış işleri naziri Pavlo Klimkin, ilhaq etilgen Qırımda ukrain faali Volodımır Baluhnıñ aqsız yerge mahküm etkenler cezalanacağından emin. Bu aqta o yanvarniñ 16-nda Twitterde yazdı.

«İşğalci akimiyetniñ yalancı mahkeme sisteması çelik iradeli insanlar qarşısında küçsüz qala. Volodımır Baluhnıñ mahkemede aytqan soñki sözleri – ür insannıñ bizge aytqan ögütidir. Ucu-bucağı olmağan bu qanunsızlıqta qabaatlı olğanlar cezalanacaq», – dep qayd etti Klimkin.

Kremlniñ nezaretindeki Aqşeyh rayon mahkemesi yanvarniñ 16-nda, patron saqlağanında qabaatlanğan ukrain faali Volodımır Baluhnı üç yıl ve yedi ayğa yaşav tarzı koloniyağa yollamağa ve 10 biñ rublelik cöreme tölemeknen (tahminen 4,6 biñ grivna – QA) cezalamağa qarar berip, faalni otırışuv esnasında apiske aldı.

Bundan evel rus prokurorı, mabüsnı 5 yıl ve 1 ayğa azatlıqtan marum etip, yaşav tarzı koloniyağa yollamağa ve 20 biñ rublelik (tahminen 9,2 biñ grivna – QA) cöreme ödemesinen cezalanmasını talap etken edi.

Yanvarniñ 15-nde mahkeme toplaşuvında Baluh, soñ sözüni aytar eken, oña qarşı açılğan dava «onıñ siyasiy noqta-i nazarından dolayı uydurılğanını» ayttı ve bu onı «yañı Vatanını» sevmege mecbur etmez, dep ayttı.

FSB Volodımır Baluhnı 2016 senesi dekabrniñ 8-nde tutıp alğan edi. FSB hadimleri Volodımır Baluh yaşağan evniñ çardağında 90 dane patron ve bir-qaç TNT blokları tapılğanını beyan etken edi.

2017 senesi avgust ayında, mahkeme onı üç yıl ve yedi ayğa apiske oturtmağa ve on biñ rublelik cöreme tölemeknen cezalamağa qarar bergen edi. İstinaf arizası baqılğan esnasta Baluhnıñ ükümi lâğu etildi. Dava tekrar baqılmasına yollanıldı.

Dekabrniñ 1-nde Aqşeyh rayon mahkemesi ukrain faaline nisbeten sıñırlama tedbirini eki ayğa ev apisine deñiştirgen edi.

Baluhnıñ imayesi, o ukrain tarafdarı olğanı sebebinden – divarındaki yazı ve azbarında Ukraina bayrağı asılğanı içün – basqılarğa oğratılğanını tasdiqlay.

XS
SM
MD
LG