Almaniyadaki «Siemens» şirketiniñ bir şubesi, daa evel strukturaları, añlaşmanı bozaraq Siemens gaz turbinalarını ilhaq etilgen Qırımğa qanunsız ketirip, Almaniyanıñ «Siemens» ana şirketini aldatqan «Rosteh» şirketi ile yañı emekdaşlıq leyhasını tasdiqladı. Bunı yanvarniñ 11-nde Rusiyeniñ TASS devlet agentligi bildirdi.
Almaniyadaki Siemens Healthcare GmbHniñ şubesi olğan Rusiyedeki «Siemens sağlıq saqlav» sıñırlı mesuliyetli şirketiniñ (OOO) matbuat kâtibi İnna Domoratskayanıñ bildirgenine köre, «Siemens» şirketiniñ bu şubesi Rusiyeniñ bölgelerinde merkeziyleştirilgen tedaviylev-diagnostika laboratoriyalarını meydanğa ketirme leyhasınıñ ömürge keçirilmesi içün öz tehnologiyaları ve tecribesini taqdim etmege azır.
Daa evel yanvarniñ 11-nde aynı agentlik, Rusiyeniñ Sağlıq saqlav nazirliginde adı añılmağan şahısnı ve añlaşmanıñ tafsilâtlarını söylemegen «Rosteh» vekillerini taqdim etken malümatınıñ menbaları olaraq kösterip, böyle añlaşma aqqında bildirgen edi.
Almaniyanıñ Siemens şirketi ve onıñ iştiraki ile meydanğa ketirilgen Rusiyedeki «Gaz turbinalarınıñ Siemens tehnologiyaları» şirketi mahkemelerde «Rosteh»niñ şubeleri olağan aynı «Tehnopromeksport» adlı (OAO «Tehnopromeksport» ve OOO «Tehnopromeksport») eki şirket ile ilhaq etilgen Qırımğa ketirilgen Almaniya şirketiniñ dört gaz turbinası boyunca neticesiz davalar yapalar. «Siemens», olarnıñ añlaşma boyunca Rusiyedeki termik elektrostantsiya içün alınğanlarını ve yarımadağa qarşı sanktsiyalar qullanılmaqta olğanları sebebinden bu añlaşma boyunca olarnıñ Rusiyeden Qırımğa alıp ketilmesi qatiyen istisna etilgenenini qayd ete. Rusiye tarafı, eki «Tehnopromeksport»tan ilk añlaşma yapqan birisi, turbinalarnı alıp, ekincisine satqan soñ, olar endi «ekinci el bazarında alınğan» sayıla ve bu sebepten ilk añlaşmadaki sıñırlamalar olarğa alâqalı degiller, dep iddia ete.
Dekabrniñ 10-nda Rusiyede nevbetteki mahkeme Almaniya şirketiniñ davası boyunca nevbetteki red qararını çıqardı: Moskvadaki Arbitraj mahkemesi Almaniyadaki «Siemens» şirketiniñ Rusiyedeki «qızı» tarafından Rusiyedeki «Rosteh» şirketiniñ strukturalarına qarşı açqan ilhaq etilgen Qırımda qurulayatqan elektrostantsiyalar içün ketirilgen turbinalarnıñ qaytarılamsı boyunca davasını red etti. Daa evel, 2017 senesiniñ dekabrinde, aynı mahkeme Almaniyadaki Siemens ana şirketiniñ, añlaşma bozulıp yarımadağa ketirilgen dört gaz turbinasınıñ Qırımdan Rusiyege qaytarılması boyunca davasını red etti. Noyabrde ise aynı mahkeme bu turbinalarnıñ tevqif etilmesi boyunca davanı üçünci kere red etti.
Aqyarda ve Aqmescitte qurulğan termik elektrostantsiyalar (TES) içün dört Siemens gaz turbinalarınıñ ketirilmesi aqqında daa 2017 senesi iyünniñ başında belli oldı. Bundan soñ Almaniya şirketi, Rusiye devletine tabi olğan Rusiye şirketlerine donatmalarınıñ ketirip teslim etilmesini toqtattı, dep bildirdi. Avropa Birligi ise bu vaqia munasebeti ile Rusiyege qarşı sanktsiyalarını kenişletti.
