Link açıqlığı

Aqmescitte mahkeme «Hizb ut-Tahrir işi» figurantı Abdullayevni apiste qaldıırdı


Kremlniñ kontroli altında bulunğan Qırım Yuqarı mahkemesi Aqmescitteki «Hizb ut-Tahrir işi» figurantı Uzair Abdullayevge apis muddetiniñ uzatılmasına qarşı berilgen appelâtsion şikâyetni red etti. Bunı yanvarniñ 11-nde Qırım.Aqiqat içün bergen izaatta «Qırım birdemligi»niñ faaliyetçisi Server Mustafayev ikâye etti.

Mustafayev: «Bugün sıñırlav tedbiriniñ uzatılmasına qarşı berilgen şikâyet baqıldı. Neticeler ep aynı: deñiştirilmeyip qaldırıla, bundan evelki maqamnıñ qararı yerine ketirile. Butün bular, tergevciniñ, sanki tahqiqat izolâtorınıñ tışında tutmulması imkânsız, şaatlarğa tazyıq etmesi ve qaçmasınıñ imkânı olğanı aqqında sözlerine esaslana. Yani ep aynı uydurılğan manaçıqlar», – dedi.

Onıñ malümatına köre, bugünki oturışuvda qabaatlanğannıñ menfaatlarını Rusiye devlet advokatı qorçalay edi.

Faaliyetçi: «Advokatlarımız Rostov-na-Donu şeerine barğan ediler. Bugün olar Qırımğa qaytıp yetiştiremediler. Mahkeme böyle şeylerni añlamaq ve oturışuvnı başqa künge avuştırmaq kerek. Lâkin olar böyle şeylerni endi qabul etmey ve birden devlet advokatını tayin eteler», – dep ilâve etti.

Dekabrniñ 8-nde Rusiyeniñ kontroli altında bulunğan Qırım Yuqarı mahkemesi Aqmescitteki «Hizb ut-Tahrir işi» figurantlarına apis muddetini uzattı. Emil Cemadenov, Rustem İsmailov, Ayder Saledinov, Teymur ve Uzair Abdullayevler apiste fevralniñ 11-ne qadar qalacaqlar.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep sayalar. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG