Link açıqlığı

Tavriya universiteti Ukraina Tasil nazirliginden qırımtatar bölügi içün eki vakansiya istey


Vernadskiy adına Tavriya milliy universitetiniñ Filologiya ve jurnalistika institutı Ukraina Tasil nazirligine, qırımtatar bölüginiñ ocaları içün qoşumça eki stavkanıñ ayırılmasını rica etti. Bunı Qırım.Aqiqatqa institutnıñ rehberi Svetlana Kuzmina bildirdi.

O: «Biz Tasil ve ilim nazirligine muracaat etip, bizge qırımtatar filologiyası içün eki stavkanıñ ayırılmasını istedik. Bunı, bizde garantiya etilgen yerler ve ocalarda ders bermek ve ilmiy tetqiqatlarnen oğraşmaq imkânları olsun, dep yaptıq», – dedi.

Kuzmina, qırımtatar filologiyası bölüginiñ ocaları ziyadesi ile yüklü olğanları içün, olarda ilmiy işnen oğraşmaq imkânları yoq, dedi.

Onıñ aytqanına köre, şimdi TMUda birinci kursta 8 ve ekinci kursta 3 talebe oquy ve 4 oca çalışa. Kuzminanıñ aytqanına köre, şarq filologiyası kafedrasında talabeler az olğanı içün 2017 senesiniñ oktâbrinde institut onı roman-german filologiyası kafedrasınen birleştirdi.

2015 senesiniñ başında Qırımdaki Rusiye akimiyeti Vernadskiy adına Tavriya milliy universitetini yoq etti. Aynı şu yılı birleştirilgen «federal universitet» meydanğa ketirildi. Oña bir qaç aliy oquv yurtu ve bu cümleden TMU, Georgiyevskiy adına Qırım devlet tıbbiyet universiteti ve bir qaç diger ilmiy teşkilât kirdi. «Qırım federal universiteti»niñ strukturasına qararnen 13 umum tasil ve ilmiy muessise kire.

Ukrainanıñ qıtadaki qısmında 2016 senesinden başlap, ilhaq etilgen Qırımdan köçken Vernadskiy adına Tavriya milliy universiteti (TMU) çalışa. Universitette ilhaq etilgen Qırımdan talebelerni keçirmek ve sadeleştirilgen şekilde qabul etmek içün programlar çalışa.

XS
SM
MD
LG