Almaniyanıñ Adidas şirketi, Rusiye tarafından ilhaq etilgen Qırımda özüniñ satıcı şirketleriniñ çalışması aqqında iddialarnı red etti. Bu hususta Deutsche Welle yaza.
Şirketniñ matbuat hizmetinde DWniñ sualine cevaben: «Adidas printsipial olaraq cariy olğan (Ukrainanıñki – QA) qanunğa riayet ete», – dep bildirdiler.
Daa evel Ukraina tış işleri naziri Pavlo Klimkin Almaniyanıñ Volkswagen ve Adidas şirketlerine qarşı tenqit ile çıqış yapqan edi.
Volkswagen AG matbuat şubesinde, avtoşirket ve onıñ erkânına kirgen bütün brendler ilhaq etilgen Qırımda cariy olğan sanktsiyalar rejimine riayet eteler, dep bildirdiler.
Bundan evel QMC Prokuraturası, Ukraina Telükesizlik hizmeti ilhaq etilgen Qırımda ihtimal ile DHL Express, Adidas ve Puma alman şirketleriniñ çalışması aqqında malümatını teşkerecek, dep bildirdi.
2017 senesiniñ iyüninde, yarımadada termik elektrostantsiyanıñ qurulması içün kerek olğan Siemens alman şirketiniñ turbinalarını Rusiye tarafından ilhaq etilgen Qırımğa ketirilmesi ile alâqalı olaraq büyük bir dava açıldı. Siemens ve onıñ iştiraki ile qurulğan «Gaz turbinalarınıñ Siemens tehnologiyaları» şirketi, Avropa Birliginiñ sanktsiyaları ile yasaq etilgen Rusiyeden Qırımğa turbinalarnıñ ketirilmesine qarşı mahkeme davasını açtılar.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
