Sabıq Qırım sağlıq saqlav nazirini yanvarniñ 5-nde Kyivde sorğulaylar. Oña, devletke hainlik yapqanında şekli olğanını resmen bildiridiler. Bunı Qırım.Aqiqatqa Qırım Muhtar Cumhuriyeti Prokuraturasınıñ matbuat kâtibi Tatyana Tihonçik bildirdi.
O: «Ayrı akimiyet vekilleri ve KHV tarafından onıñ tevqif etilgeni aqqında bildirilgen malümat doğru degil», – dedi.
Onıñ aytqanına köre, cinaiy işiniñ alıp barılması çerçivesinde, mahkeme qararını icra etmek maqsadınen sabıq Qırım sağlıq saqlav naziriniñ Kyivde bulunğan yerinde Ukraina telükesizlik hizmetiniñ hadimleri tintüv yaptı. Tintüv esnasında ondan Rusiye vatandaşı pasportı, Qırımnıñ Rusiyege tabi yolbaşçısı Sergey Aksönov tarafından imzalanğan hizmet şeadetnamesi ve onıñ Rusiye tarafından tayin etilgen Qırım akimiyeti ile alâqalarını tasdiqlağan diger vesiqalar musadere etildi.
Qırım Muhtar Cumhuriyeti Prokuraturasınıñ matbuat kâtibi: «Şimdi mezkür şahıs öz advokatınen beraber Qırım Muhtar Cumhuriyeti Prokuraturasına, devletke hainlik yapqanından şübheli olğanı aqqında resmiy bildirüv almaq içün keldi», – dep ilâve etti.
Muessiseniñ vekili, al-azırda Mihalçevskiyni Ukraina Cinaiy kodeksiniñ 111-nci maddesine muvafıq olaraq cinaiy cevapkârlıqqa çekmek içün çareler körüle, dep ilâve etti. Maddeniñ sanktsiyası, 15 yılğace muddetke azatlıqtan marum etüv şeklinde cezalavnı közde tuta.
Mihalçevskiy özü şimdilik Ukraina telükesizlik hizmeti ve prokuraturasınıñ bildirüvlerine izaat berbey.
2014 senesi iyünniñ 10-nda Qırımnıñ Rusiyege tabi sağlıq saqlav naziri Pötr Mihalçevskiy öz istegi ile istifa etüv aqqında ariza yazdı. Qırımnıñ Rusiyege tabi yolbaşçısı, Mihalçevskiyni «madde boyunca» işten boşamamaq içün istifa etmege mecbur etkenini söyledi.
