2017 senesi yanvarniñ 1-nden başlap Ukraina tarafından yüksek telüke teşkil etken devletlerden, şu cumleden Rusiyeden kelgen vatandaşlar içün mecburiy biometrik nezaret kirsetkenden soñ, Qırım memuriy sıñırından keçiş em ID-karta, em de 1994 senesi berilip başlanğan pasport vastasınen yapılacaq.
Yanvarniñ 4-nde Ukraina prezidentiniñ Qırım MC temsilciligi özüniñ Facebook saifesinde Qırım memuriy sıñırından eski pasportnen keçmege mümkün olmaycağı aqqındaki malümat «yalan» olğanını haber etmekte.
«İşğalciler nezareti altında bulunğan ictimaiy ağlarda, çetelge ketmege istegen Ukraina vatandaşlarınıñ keçiş noqtalarından keçişni yalıñız ID-karta şeklindeki pasport vastasınen yapabilecegi aqqındaki malümat bütünley yalan.Bu malümat yalan ve Rusiye tecvuzı devam etken vaqıtta enqastan Ukraina devlet organlarınıñ itibarını sarsmaq maqsadınen yapıla», – denilmekte haberde.
Temsilcilik vekilleri, vatandaşnıñ biometrik pasportı olmaması «kiriş-çıqış kontrol noqtasından keçmesine mania olmaycaqtır», dep qayd ete.
Ukraina prezidentiniñ temsilciligi vatandaşlardan «vekâletli uquqnı muafaza etüv idareleri tarafından teşkil etilgen bütün uquqbozıluvları aqqında haber etmekni» rica ete.
2017 senesi sentâbrniñ 1-nde Ukraina prezidenti Petro Poroşenko, 2018 senesi yanvarniñ 1-nden başlap, devlet sıñırında yerleşken keçiş noqtalarında biometrik qayd sisteması çalışıp başlaycağını bildirgeninde, Rusiye tış işleri nazirligi bunı tenqit etken edi.Dekabrniñ 27-nden itibaren bu sistema test rejiminde çalışıp başladı.
Ukraina Devlet Sıñır hızmetinin sözcüsi Oleg Slobodyan haber etkenine köre, biometrik malümat nezareti Qırımda yaşağan Ukraina vatandaşlarına tesir etmeycek.
Yanvarniñ 1-nden itibaren çetel vatandaşlarınıñ biometrik malümatını qayd etüv sisteması boyunca ukrain sıñırcıları 2700den ziyade kişini, şu cumleden 500 Rusiye vatandaşını keçirgen.
