Volkswagen AGniñ matbuat şubesinde RİA «Novosti» haber agentligine, Volkswagen avto şirketi ve oña kirgen bütün brendler ilhaq etilgen Qırımda sanktsiyalar rejimine riyayet eteler, dep bildirdiler.
Matbuat hizmetiniñ cevabında: «Elbette, Volkswagen şirketine kirgen markalar sanktsiyalarnı küte ve qararlarğa riayet eteler. Başqa türlü qıymet kesüvlerni biz añlatıp olamaymız», – denile.
Daa evel Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi, dünya avtomobil şirketleriniñ qabul etilgen sanktsiyalarğa rağmen ilhaq etilgen Qırımnıñ territoriyasında çalışqanlarını bildirdi.
Bildirüvde: «Ukrainanıñ vaqtınca işğal etilgen territoriyasında bulunğan satıcı merkezleri tarafından dünya avtomobil brendleri olğan Nissan, Toyota, Peugeot, Mitsubishi, Kia Motors, Volkswagen, Mersedes-Benz, Audi, Skoda, Isuzu, Bayerische Motoren Werke AG (BMW), Renault ve Leksus markalarınıñ qullanıluvı ile tolu kölemde hizmetler berüv ve şu cümleden mezkür ticariy markalarnıñ avtomobillerini satuv, munasip vesiqalarnı berüv, avtomobillerge tehnik hizmet kösterüv, original yedek parçalarını satuv, kefalet işlerini yapuv ve diger beñzer faktlar meydanğa çıqarıldı», – denile.
Dekabrniñ başında Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi Qırımda Almaniya şirketlerinden DHL Express, Adidas ve Pumanıñ qanunsız çalışqanlarını bildirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
