Ukraina tış işleri naziri Pavlo Klimkin, Moskvanıñ ilhaq etilgen Qırımda 2018 senesi Rusiye prezidentiniñ saylâvlarını keçirme teşebbüsini «olarnıñ resmiy olaraq tanılmasında şube doğura», dep saya.
«Rusiye saylâvlar kününi Qırımda ötkerilgen qanunsız referendum kününe keçirdi. Bu añlı bir adım edi. Bu saylâvlarnı ilhaq etilgen Qırımda keçirme teşebbüsi «olarnıñ resmiy olaraq tanılmasında şube doğura», – dep bildire Twitterde Ukraina MİDi, alman zenaatdaşı Sigmar Gariel ile yapqan körüşüvi esnasında Klimkinniñ aytqan sözlerini.
Onıñ sözlerine köre, ukrain akimiyeti «Rusiye saylâvğa azırlanğan vaqıtta, şu cumleden arbiy provokatsiyalar da teşkil etebilecegine» azır turmaqta.
Rusiye akimiyeti işbu hususta iç bir türlü açıq izaat bermey.
Rusiye prezidenti saylâvları 2018 senesi martnıñ 18-ne yani- Qırım ilhaq etilgen künge tayin etildi. Saylâvlarda hususan, Rusiyeniñ şimdiki prezidenti Vladimir Putin, televizyon alıp barıcısı Kseniya Sobçak, işadamları aq-uquqları boyunca vekâletli temsilcisi Boris Titov, LDPR lideri Vladimir Jirinovskiy, «Yabloko» esasçısı Grigoriy Yavlinskiy ve KPRF adına Moskva civarında yerleşken sovhoz mudiriPavel Grudinin iştirak etmek niyetindeler.
Noyabrniñ 13-nde Qırımnıñ rusiyeli yolbaşçısı Sergey Aksönov Rusiye prezidenti saylâvlarına azırlıq körmek içün «idarelerara iş gruppası» teşkil etilmesini emir etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.
