2018 senesiniñ baarinde qomşu Rusiyedeki prezident saylavı esnasında, ilhaq etilgen Qırımda Avropa missiyalarnıñ vekilleri olmaycaq. Bunı Gazeta.ua bildire.
Avropada telükesizlik ve iş birligi boyunca teşkilât (OSCE) ve Avropa Birligi ilhaq etilgen Qırımda rey berüvni közetmek içün közeticilerini yollamaycaqlar. Bu hususta Ukraina prezidenti Petro Poroşenkonıñ Almaniya çetel işleri naziri Frank-Valter Ştaynmayer ile körüşüvi esnasında aytılğan edi. Ondan ğayrı körüşüvde Fransanıñ tış işleri naziri Jan-Mark Ero buluna edi, dep yaza neşir.
Bunıñ arfesinde OSCEde, Rusiyedeki rey berüvni 500 mutehassısnıñ közetecegini bildirdiler. Lâkin ilhaq etilgen Qırımğa kimse barmaycaq.
Avropa parlamentiniñ deputatı Tomaş Zdehovskıy: «Brüssel közeticilerini Qırımğa degil de, Rusiyege yollaycaq. Qabul etken taraf ile müzakereler devam ete», – dep qayd etti.
Rusiyede prezident saylavı 2018 senesi martnıñ 18-ne tayin etildi. Şimdiki devlet prezidenti Vladimir Putinden ğayrı onda, cümleden, telealıpbarıcı Kseniya Sobçak, iş adamlarınıñ aqları boyunca vekil Boris Titov, Rusiye Liberal-demokratik fırqasınıñ (LDPR) lideri Vladimir Jirinovskiy, «Yabloko»nıñ qurucısı Grigoriy Yavlinskiy, iş adamı Sergey Polonskiy ve Rusiye Federatsiyası Kommunistik fırqası (RFKF) tarafından namzet kösterilgen «Lenin adına Sovhoz» işhanesiniñ mudiri Pavel Grudin iştirak eteler.
Rusiye muhalifi Aleksey Navalnıy da saylavda iştirak etmek içün vesiqalar berdi, lâkin Merkeziy saylav komissiyası (TSİK), muhalifniñ daa evel mahküm etilgenine sıltap, olarnı red etti. Ondan soñ Navalnıy saylavlarnı boykot etmege davet etip, umum Rusiye narazılıq aktsiyasınıñ yapılacağını ilân etti.
