Qırım ilhaqını tenqit etkeni içün separatizmge çağıruvda qabaatlı dep tanılğan Rusiye Tatar cemaat merkeziniñ yolbaşçısı Rafis Kaşapov azatlıqqa çıqtı. Bu aqta Twitterde «Agora» halqara uquqimaye gruppasınıñ reberi Pavel Çikov ikâye etip berdi.
Onıñ sözlerine köre, Kaşapov azatlıqqa dekabrniñ 27-nde çıqqan eken.
Rusiyede Rafis Kaşapov, Rusiye tarafından ukrain Qırımınıñilhaq etilgenini tenqit etkeni içün apis cezasına mahküm etilgen ilk kişi dep tanılmaqta.
2015 senesi sentâbr ayında Tatar cemaat merkeziniñ yolbaşçısı Rafis Kaşapov Qırım ilhaqını tenqit etkeni içün separatizmge çağıruvda qabaatlı dep tanılaraq, üç yılğa apis cezasına mahküm etilgen edi. Kaşapov mahkeme qararına qarşı insan aqları boyunca Avropa mahkemesinde dava açqan edi.
2017 senesi mayıs ayında Rusiyeniñ Naberejnıye Çelnıde keçken mahkeme Tatar cemaat merkezini ekstremist teşkilâtı dep tanıyaraq, Rusiye toprtaqlarında onıñ faaliyetini yasaqlağan qarar qabul etken edi.
Tatar cemaat merkezi ükümetke bağlı olmağan bir teşkilât dep esaplana ve tatar milliy özgünligi, tili ve medeniyetiniñ saqlanması oğrtunda kampaniyalar keçire.
