Link açıqlığı

Saatnıñ esas haberi

Ukrainanıñ arbiy hadimleri 2017 senesi fevralniñ 27-sinde Qırımnıñ ilhaqını toqtata bile ediler – ADQ komandanı


Ukraina Arbiy deñiz quvetleriniñ komandanı İgor Voronçenko (merkezde)
Ukraina Arbiy deñiz quvetleriniñ komandanı İgor Voronçenko (merkezde)

Ukraina Arbiy deñiz quvetleriniñ komandanı İgor Voronçenko, Ukrainanıñ arbiy hadimleri 2017 senesi fevralniñ 27-sinde yarımadanıñ Rusiye tarafından ilhaqını toqtatmaq içün Qırım Yuqarı Radasınıñ binasını eki tanktan ateşke tutmağa azır olğanlarını bildirdi.

«Ukrainskiye Novosti» haber agentligi, bunı o, devletke hainlik yapqanında qabaatlanğan sabıq prezident Viktor Yanukoviçniñ işi boyunca mahkemede sorğulanğanda söyledi, dep bildire .

O vaqıt flot komandanınıñ yalı mudafaası boyunca muavini olğan Voronçenko, 2017 senesi fevralniñ 27-sinde Ukraina ADQ rehberlerine Qırım Yuqarı Radasınıñ binasını işğalcilerden azat etmek içün tanklarnı qullanuv planını taqdim etti.

Ondan ğayrı Voronçenko, Ukraina Telükesizlik hizmetiniñ mahsus bölügi olğan «Alfa»nıñ, Qırımda zapt etilgen binalarnı azat etmege azır olğanını söyledi.

Daa o, Qırımnıñ ilhaqı esnasında silânıñ qullanılması aqqında yazılı şekilde iç bir emir almağanını qayd etti.

Voronçenko emindir ki, Rusiyeniñ Qırımdaki tecavuzından evel arbiy vaziyetni Yanukoviç ilân etmek kerek edi.

ADQ komandanınıñ aytqanına köre, Rusiye Qırımnıñ ilhaqı esnasında Ukrainanıñ arbiy hadimlerine Ukraina Mudafaa nazirligi adından silânı teslim etüv aqqında sahte emirlerini yollay edi.

Rusiye tarafından bu hususta açıq menbalarda izaatlar berilmedi.

Dekabrniñ 27-sinde Kyivde mahkeme Voronçenkonı Yanukoviçniñ işi boyunca şaat olaraq sorğuladı.

İyünniñ soñunda mahkeme Ukrainanıñ sabıq prezidenti Viktor Yanukoviçniñ devletke hainlik etkeninde qabaatlanması boyunca işniñ ğiyabiy şekilde baqılmasına keçti. Bundan soñ Yanukoviçniñ advokatları bu protsesste iştirak etüvden vazgeçti. Oña endi bir qaç kere devlet advokatı tayin etildi.

Yanukoviç Ukrainada bir qaç cinaiy işniñ ve bu cümleden 2013 senesiniñ noyabrinden 2014 senesiniñ fevraline qadar vekâletleriniñ arttırması, Meydanda faaliyetçilerniñ kütleviy surette öldürilmesi ve 2010 senesinde devlet akimiyetiniñ zapt etmesi boyunca cinaiy işlerniñ figurantı ola.

Meydanda narazılıq köstergenler qurşunğa tutulğan soñ Rusiyege qaçqan Ukrainanıñ sabıq prezidenti özüne qarşı kösterilgen qabaatlavlarnı red ete.

XS
SM
MD
LG