Link açıqlığı

Qırımnıñ ilhaqı vaqtında Rusiye Ukrainanıñ arbiy hadimlerine silânıñ teslim etilmesine dair sahte emirler yollay edi – ADQ komandanı


İgor Voronçenko ve Petro Poroşenko

Ukraina Arbiy deñiz quvetleriniñ (ADQ) komandanı İgor Voronçenko, Rusiye Qırımnıñ ilhaqı vaqtında Ukrainanıñ arbiy hadimlerine Mudafaa nazirligi adından silânıñ teslim etilmesine dair sahte emirler yollay edi.

«Ukrainskiye novosti» agentligi, bunı o, dekabrniñ 27-sinde devletke hainlik yapqanında qabaatlanğan sabıq prezident Viktor Yanukoviçniñ işi boyunca mahkemede sorğulanğanda söyledi, dep bildire.

Haber agentligi, Voronçenkonıñ sözlerini ketirip: «2014 senesi martnıñ 12-sinde men, Ukraina mudafaa naziri vazifesini vaqtınca eda etken İgor Tenühten, içinde silânı teslim etmek emri olğan arbiy kuryet hizmetiniñ paketini aldım», – dep bildire.

KHV bildirgeni kibi, o vaqıt vesiqadaki mudafaa naziri vazifesini eda etkenniñ imzası ve mühür onda şübhe doğurdılar. Voronçenko, mühürde Ukrainada qullanılmağan «Ukraina Mudafaa nazirliginiñ kâtipligi» yazısı bar edi, dep qayd etti.

Ondan soñ ilhaq vaqtında flot komandanınıñ yalı mudafaası boyunca muavini vazifesinde bulunğan Voronçenko Tenühke telefon etti ve o, silânıñ teslim etilmesi aqqında iç bir emir bermegenini söyledi.

Voronçenko, 2014 senesi martında Rusiye arbiy hadimlerinıñ, onı esir alıp, 4 kün tutqanlarını bildirdi.

Aynı zamanda, Ukraina arbiy hadiminiñ aytqanına köre, Rusiye generalı İgor Turçenük onı, Rusiye tarafına keçmesine qandırmağa areket ete edi. O, bunı red etken soñ Rusiye arbiy hadimleri, ücüm etip, arbiy qısımnı zapt ettiler.

Voronçenko, Rusiye arbiy hadimleriniñ Qırımnı zapt etmege azırlınğanları aqqında bütün malümat o vaqıt ADQ komandanları olğan Yuriy İlyin, Dmitriy Şakuro ve Sergey Yeliseyevge yollanıla edi, faqat olar oña qarşı bir şey yapmay ediler, deye iddia ete.

Rusiye telükesizlik hadimleri tarafından bu hususta açıq menbalarda izaatlar berilmedi.

Dekabrniñ 27-sinde Kyivde mahkeme Voronçenkonı Yanukoviçniñ işi boyunca şaat sıfatında sorğulamağa başladı.

Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG