Aqmescitte, oktâbrniñ 14-nde qırımtatarlarğa qarşı yapılğan repressiyalarğa narazılıq bildirmek maqsadınen ötkerilgen bir kişilik piketlerniñ iştirakçileri, birinci maqam mahkemeleri tarafından özlerine dair 10 biñden 15 biñge qadar rublelik (4,7 biñden 7,1 biñge qadar hrivnalıq – QA) cöremelerni tayin etmek qararlarına qarşı kütleviy surette appelâtsiya şikâyetlerini berdiler.
Qırım.Aqiqat muhbiri, şikâyetlerni bermek içün 50-den ziyade qırımtatar faaliyetçileri keldi, dep bildire .
Aq-uquq qoruyıcısı Lutfiye Zudiyeva: «Appelâtsion mahkeme bu qararlarnı lâğu etmese, biz İnsan aqları boyunca Avropa mahkemesine (İAAM) şikâyetler berecekmiz», – dedi.
Bir kişilik piketniñ iştirakçısı Lenur Kerimov, «(oktâbrniñ 14-ndeki – QA) aktsiyağa öz başıma çıqtım, evelden kimsenen kelişmedim», dep bildirdi.
Kerimov: «Ve kerek olsa, öz fikrimi ifade etmek içün bir daa çıqarım. Bizni qorquzacaq olalar, lâkin, fikrimce, bir şey yapıp olamazlar», – dedi.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Dekabrniñ 18-nde, daa evel tintüvler ve tevqiflerge cevaben bir kişilik piketlerge çıqqan qırımtatarlarniñ işleri boyunca mahkeme oturışuvları ötkerildi. Olarğa qarşı, piket ötkerilmesiniñ tayin etilgen tertibini bozğanları içün (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde berilgen hulâsa, qabaatlav tarafınıñ esas delili olaraq qabul etilmekte.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
