Link açıqlığı

Saatnıñ esas haberi

Aq-uquq qoruyıcılarınıñ közetüvi altında: Veciye Kaşkanıñ ailesi nasıl yaşay


Qırımtatar milliy areketiniñ veteranı Veciye Kaşka Qırımnıñ Qarasuvbazar rayonında oğlu ve qız torunı ile beraber yaşay edi. Onıñ ölüminden soñ olar ağır vaziyette qaldı.

Qırım insan aqları boyunca alâqa grubunıñ koordinatorı Abdureşit Cepparov: «Qorantanıñ bütün toplağan parasından marum qalması azlıq etkeni kibi, olarnı şimdi endi «Veciye Kaşka işi» boyunca da raatsızlap başlaylar. Men olarnen beraber bardım. Biz bu qorantanı közetip, olarğa yardım etecekmiz. Bu, Veciye Kaşka ögünde borcumızdır», – dedi.

O, qorantanıñ em uquqiy, em de maneviy yardımğa muhtac olğanını qayd etip: «Olarğa, Veciye apteniñ yanlarında olmağanına alışmaq qıyın», – dey.

Veciye Kaşkanıñ oğlu, faaliyetçi Türkiyede tedaviylengen soñ sağlığı eyilişmege başladı, dey.

Ali Kaşka: «Anamnıñ sağlığı o qadar eyilişti ki, o bostanda çalışıp başladı. Özüni yahşı is ete edi. Maña köre, bu adise olmasa, o, daa on yıl qadar yaşar edi», – dep ikâye ete.

Torunı Aliye qartanasınıñ ölümini pek ağır keçire. Onıñ aytqanına köre, Yusuf Aytan oña ola qorantağa qatnap başladı.

Qartanam Türkiyeden qaytqanda o, endi qorantamızğa qatnay edi. Onıñ tarafından bu samimiy olmağanı aqlımızğa bile kelmey edi
Aliye

Aliye: «Biz internette tanış oldıq. O, celp etici teessurat doğura edi. Qartanam o vaqıt Türkiyede edi. Ve onıñ qartanam aqqında çoq soraştırğanı, selâmlar söylegeni, onı ketirmek içün Türkiyege barmaq istegeni meni biraz taacipley edi. Qartanam Türkiyeden qaytqanda o, endi qorantamızğa qatnay edi. O, onda da eyi bir teessurat doğurdı. Onıñ tarafından bu samimiy olmağanı o zaman aqlımızğa bile kelmey edi», – dey.

Qorantanıñ aytqanına köre, türk, Veciye Kaşka büyük bir sermayege malik, dep tüşüngendir, amma böyle olmağanını añlağan soñ bütün toplağan paraları olğan yedi biñ dollarnı alıp, qorantanı terk etti.

Ali Kaşka: «Bütün paralarımıznıñ milliy areketke ketkenini qaydan bilsin. 1980-nci yıllarnıñ soñundan başlap, bizde muntazam surette areket iştirakçileriniñ toplaşuvları ötkerile edi. Pek çoq kişi gecelemek içün qala edi. Anam er keske aş bere, er keske yardım ete edi. Yalıñız bergen qoyları esaplanacaq olsa, adı-esabı olmaz. Milliy areketniñ ihtiyacları içün avtomobil bile satın aldı. Ve bütün bular ailemizniñ büdjetinden alına edi. Biz buña iç bir vaqıt itiraz etmedik. Bizler içün bu ayat norması edi», – dey. Onıñ aytqanına köre, Veciye Kaşka dostlarına türkni, hırsızlağan paralarını qaytarmaq kerek, dep qandırmağa rica etti.

Ali Kaşka, Veciye Kaşkanıñ oğlu
Ali Kaşka, Veciye Kaşkanıñ oğlu

Abdureşit Cepparov: «Men, faaliyetçiniñ kiyevi olamağan bu şahıs ile laf etmege razı olğan Veciye Kaşkanıñ dostları tarafından yapılğan işte iç bir cinayet körmeyim. Bunı er bir namuslı adam yapar edi. Eger o böyle bir rica ile maña muracaat etse edi, men de oña yardım eter edim», – dey.

Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlana. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.

Noyabrniñ 24-nde Aqmescitteki Kyiv rayonı mahkemesi faaliyetçilerni 2018 senesi yanvarniñ 15-ne qadar apis etti.

XS
SM
MD
LG