2018 senesinde Rusiyede prezident saylavına qatılmaq niyet etkenini bidlirgen Rusiye televizion alıp barıcısı Kseniya Sobçak, «123 ağır adım» dep adlandırılğan saylav evelki programını neşir etti. Vesiqa Rusiye tarafından ilhaq etilgen Qırım meselesine de toquna. Sobçak, «tertibi Rusiye, Ukraina ve dünya topluluğu tarafından uyğunlaştırılacaq» referendum ötkerilmek kerek, dep israr ete.
O, halqara uquqına binaen yarımada Ukrainanıñ territoriyasıdır, dep qayd etti.
Ondan ğayrı, vesiqanıñ esas ükümleri arasında Rusiyede demokratik muessiselerni meydanğa ketirüv, umum Avropa qanunları ve degerliklerine riayet etüv, diger devletlernen barışıqlı munasebetler quruv ve Rusiye vatandaşlarınıñ barlıqlı yaşayışına doğrultılğan iqtisadiyat yer almaqtalar.
Programda ayrıca, diskriminatsiya etici qanunlarnı lâğu etmek ve vatandaşlar tarafından siyasiy irade ve teşebbüsniñ izhar etilmesini sıñırlağan qanun ükümlerini yañıdan baqıp çıqmaq kerek, dep qayd etile.
Sobçak, bütün telükesizlik strukturlarınıñ aqlarını qanun ceetinden sıñırlamaq ve ondan ğayrı vazifelerge saylanğan şahıslar ve bütün seviyedeki parlament deputatlarını keri çağıruv ve impiçment protseduralarını tayin etmekni teklif ete.
Rusiyedeki «Vatandaş teşebbüsi» («Grajdanskaya initsiativa») fırqası, 2018 senesi Rusiye prezidenti saylavına Kseniya Sobçaknı namzet kösterilmesine rey birligi ile qol tutup, dekabrniñ 23-ne saylavdan evelki qurultayını tayin etti.
Kseniya Sobçak oktâbrniñ 18-nde prezident saylavına qatılmaq istegenini resmen bildirdi. O, özüne «er keske qarşı» namzetim, dey.
Sobçak, ilhaq etilgen Qırımda saylavdan evelki teşviqat kampaniyasını yapmaycağını söyledi. O, Rusiye Qırımnı ilhaq etip, halqara mecburiyetlerini bozdı, dep bildirdi. Onıñ fikrine köre, ilhaq, cümleden, Rusiye ealisiniñ faqirleşkenine ketirdi.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında ötkermek planlaştıralar. Daa evel saylav kününiñ başqa künge keçirilmesine dair qanun, Rusiyeniñ Devlet duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
