Ukraina ilhaq etilgen Qırım üzerinde kontrolini qaytarğan soñ «Krımska svitlıtsâ» gazetası qırımtatar muhtariyetiniñ baş neşiri olacaq. Bunı Qırımtatar Milliy Meclisi reisi Refat Çubarov neşirniñ 25 yıllığı munasebetinen Kyivde ötkerilgen tantanalı toplaşuvda söyledi.
O, ukrain tilinde çıqqan bu gazeta, qırımtatar neşirleri ile bir arada çıqacaq, dep qayd etti.
«Biz qaytqan soñ «Krımskaya pravda» yoqluqqa qavuşacaq. «Krımska svitlıtsâ» Qırım muhtariyeti, qırımtatar muhtariyetiniñ tilinde çıqacaq. Qırımtatar gazetaları ve «Krımska svitlıtsâ» olacaqlar», – dedi o.
Ondan ğayrı Çubarov, Qırımnıñ ilhaqından evel gazetanıñ, ukrain cemiyetindeki faal qısmınıñ şekillenmesinde oynağan rolüni qayd etti.
Gazetanıñ birinci sanı Aqmescitte 1992 senesi dekabrniñ 31-nde çıqqan edi. Muarririyeti Kyivge 2016 senesi martında keçirildi. Çoqqa barmadan gazetanıñ neşir etilmesi ğayrıdan başlandı.
Aqmescit sakini Viktor Merjvınskıy, «Krımska svitlıtsâ» gazetasınıñ baş muarriri vazifesi içün ilân etilgen yarışta ğalip çıqtı.
Keçken sene Ukraina prezidenti Petro Poroşenko Ukraina Anayasasınıñ Qırım Muhtar Cumhuriyeti aqqındaki 10-ncı bölügine deñişmeler ve ilâveler kirsetilmesi işini başlamaq kerek olğanı aqqında söyledi.
2017 senesi mayısnıñ 11-nde Ukrainanıñ Anayasa komissiyası, Ukraina Anayasasınıñ Qırım Muhtar Cumhuriyetine dair qısmı içün deñişmeler ve ilâveler işlep çıqacaq iş grubunı meydanğa ketirmege qarar berdi.
Qırımtatar halqınıñ sürgün etilmesi qurbanlarını hatırlav künü munasebeti ile ötkerilgen tedbirler esnasında Poroşenko, Qırımda kelecekteki qırımtatar milliy muhtariyeti diger milletlerniñ aqlarını da temin etecek, dedi.
Qırımtatar muhtariyetiniñ «separatizmge iç bir alâqası yoq», ve onıñ meydanğa ketirilmesi, BMTniñ tamır halqlarınıñ aqları boyunca Beyannamesinde tayin etilgen tamır halqınıñ aqqıdır. Ukraina bu beyannamege 2014 senesinde qoşuldı, dep añlattı Ukraina İnformatsion siyaseti naziriniñ birinci muavini Emine Ceppar.
