Link açıqlığı

Saatnıñ esas haberi

Lviv vilâyetinde bir soqaqqa Qırımda öldürilgen Reşat Ametovnıñ adı berilmesine qarar berildi


Lviv vilâyeti Jovkiv rayonı Dublânskiy şeer şurası Sıtıhiv köyündeki bir soqaqqa 2014 senesi Qırımda öldürilgen Reşat Ametovnıñ adını bermege qarar berdi. Bu aqta Qırım.Aqiqatta bulunğan bir vesiqada söz yürsetilmekte.

İşbu leyhanıñ teşebbüsçisi olğan Lviv qırımtatar cemiyetiniñ reisi Rustem Emiraliyev, «soqaqnıñ böyle birtarihı işğal altında bulunğan Qırım ve Donbasstan Lviv vilâyetine çeşit vilâyetlerden köçmege mecbur qalğanukrainler arasındaki birlikke bir sebep olacağından emin».

2017 senesi Ukraina prezidenti Petro Poroşenko 2014 senesi baarde öldürilgen Qırım sakini Reşat Ametovke Ukraina Qaramanı ünvanını bergen edi.

2014 senesi martnıñ 3-nde Reşat Ametov Aqmescitteki Qırım Nazirler Şurasınıñ binası ögüne referendumge qarşı öz narazılığını bildirmek içün çıqqan soñ qırsızlanğan edi. Martnıñ 15-de ise onıñ cesedi bir çoq qıynav izleri ile Qarasuvbazar rayonınıñ ormanda tapılğan edi. Faalniñ cenazesi 2014 senesi martnıñ 18-nde Aqmescitteki «Abdal» mezarlığında yapılğan edi.

Moskva nezaret etken Qırım akimiyeti qırımtatar failiniñ qatilini tapqannı mukâfatnen taqdirlemege söz bergen edi. Lâkin qatil alâ daa tapılmadı.

XS
SM
MD
LG