Qırımtatar resurs merkezi idaresiniñ yolbaşçısı, qırımtatar Milliy Meclisiniñ azası Eskender Bariyev, onıñ ilhaq etilgen Qırımda yaşağan aqrabalarına Rusiyeniñ Qırımdaki FSB idaresinden celpname kelgeni aqqında haber ete. Bu aqta o dekabrniñ 21-nde Facebookta yazmaqta.
«İlhaq etilgen Qırımda menim yaqın soylârıma (16 yıldan berli saqat olıp üç insult, motor afaziyası keçirgen 84 yaşındaki babam, 79 yaşındaki anam, qaynanam, qaynatam, eki qız qardaşım ve ömür arqadaşıma) sorğu keçirilmesi içün FSB taqiqatçısından celpname kelgen», – denilmekte haberde.
Bariyev onıñ soylârı onıñ faaliyeti ve vatandaşlıq noqta-i nazarına«iç bir alâqası olmağanı içün» olarğa «toqunmamalarına» çağırdı. Aynı zamanda o Kyivde olğanı aqqında beyan ete.
Rusiye küç idaresi hadimleriniñ bu hususta bir izaatı yoq.
Qırımtatar resurs merkezi – bir cemaatçılıq platfortması olaraq, maqsadı Qırımda aq-uquq bozulğanı aqqında malümat toplamaq ve nezaret etmek, uquqimaye faaliyeti, normalar işleep çıqaruv ve talilden ibarettir. O bir cemaat teşkilâtı olaraq Kyivde 2015 senesi noyabr ayında qayd etilgen edi.
Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
