Rusiye prezidenti saylavına qatılmaq niyetini bildirgen Rusiye televizion alıp barıcısı Kseniya Sobçak, onıñ tarafından teklif etilgen Qırım statusı boyunca «referendum»da yalıñız Qırım sakinleri degil, aynı zamanda Ukraina ve Rusiye vatandaşları da iştirak etmek kerekler, dep saya. Bunı o, dekabrniñ 20-sinde «Sobçak. Ukraina ile dialog» matbuat konferentsiyası esnasında dedi.
«Men referendum aqqında söylegende, halqara referendumı aqqında aytam, yani (yarımadanıñ – QA) taqdirini yalıñız Qırım sakinleri degil, aynı zamanda Ukraina ve Rusiye sakinleri al etecekler. Bu territoriyanıñ kompromissi de tamam bundan ibarettir», – dedi o.
Oktâbrniñ 18-nde Kseniya Sobçak qomşu Rusiyedeki prezident saylavına qatılmaq istegenini resmen bildirdi. O, özüne «er keske qarşı» namzetim, dey.
Sobçak, ilhaq etilgen Qırımda saylavdan evelki teşviqat kampaniyasını yapmaycağını söyledi. O, Rusiye Qırımnı ilhaq etip, halqara mecburiyetlerini bozdı, dep bildirdi. Onıñ fikrine köre, ilhaq cümleden Rusiye ealisiniñ faqirleşkenine ketirdi.
Ondan ğayrı Kseniya Sobçak ilhaq etilgen Qırımda yarımadanıñ statusına dair «yañı mustaqil referendum»nı ötkermege teklif etti.
Daa soñra Sobçak, Rusiye Baş prokuraturası onıñ Qırım aqqında söylegenlerini teşkere, dep ilân etti.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında ötkermek planlaştıralar. Daa evel saylav kününiñ başqa künge keçirilmesini közde tutqan munasip qanun, Rusiyeniñ Devlet duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusına dair dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
