Dekabrniñ 20-nde, çarşenbe künü, Kyivdeki «Qırım evi» merkezinde ilhaq etilgen yarımadada tevqif etilgen qırımtatar faaliyetçileri Mustafa ve Bekir Degermenciler ile birdemlik aqşamı yapılacaq.
«Kyivdeki Qırım birligi» birleşmesi: «Tedbirde Degermenciler qorantası ve Rusiye tarafından işğal etilgen Qırımda taqip ve qanunsız olaraq mahküm etilgen daa elli kişi – faaliyetçiler, adiy vatandaşlar ve olarnıñ soy-aqrabaları ile birdemlikni köstermek, olarğa maneviy ceetten qol tutmaq istegen siyasetçiler, faaliyetçler ve bütün pervasız adamlar iştirak etecekler», – dep bildire.
Tevqif etilgen faaliyetçilerniñ aqrabaları – Mavile ve Aliye Degermenci, Qırımtatar Milliy Meclisi reisi Refat Çubarov, Qırımtatar Milliy Meclisi reisi muavini İlmi Umerov ve advokat Edem Semedlâyev tedbirniñ musafirleri olacaq.
Ondan ğayrı tedbirde, bundan soñ saytta derc etilecek Qırım.Aqiqatnıñ Degermenciler qorantası aqqında roligi taqdim etilecek.
Mustafa Degermenci – «Fevral 26 işi» figurantlarından biridir. O, 2014 senesi fevralniñ 26-sında Aqmescitte Ukrainanıñ topraq bütünligine qol tutmaq maqsadınen yapılğan tedbir vaqtındaki kütleviy qarışıqlıqlarda iştirak etkeninde qabaatlanıp, 2015 senesi mayısnıñ 7-sinde tevqif etildi. Eki yıl apiste bulunğan soñ 2017 senesi aprelniñ 6-sında ev apisine keçirildi.
Bekir Degermenci – qırımtatar milliy areketiniñ faaliyetçisidir. O, 2017 senesi noyabrniñ 23-nde diger qırımtatar faaliyetçileri ile beraber aqsız yerde para talap etüvde qabaatlanıp, tevqif etildi.
Degermencilerniñ büyüginde sürekli astma bar. Muvaqqat izolâtorda sağlığınıñ vaziyeti birden yamanlaştı. Faaliyetçi, dekabrniñ 6-nda Kremlniñ kontroli altında bulunğan Qırım Yuqarı mahkemesiniñ zalında yaramadı. Oña «acele yardım»nı çağırdılar. Dekabrniñ 14-nde o, reanimatsiyağa tüşti. Daa soñra, ekimlerniñ Degermencini esas olaraq ilâclar tesirindeki tıbbiy yuquda tutqanları belli oldı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
