Qırım Muhtar Cumhuriyetiniñ prokuraturası, devletke hainlik yapqanında qabaatlanğan sabıq Aqyar şeer şurası deputatına qarşı qabaatlav hulâsasını mahkemege yolladı. Bunı dekabrniñ 19-nda prokuraturanıñ matbuat hizmeti bildire.
Bildirüvde: «Cinaiy işniñ tahqiq etilüvi esnasında, 2014 senesiniñ martında Aqyar şeer şurası deputatınıñ, Qırımnıñ işğaline yardım ve qol tutuv köstergenine dair red etilmez deliller elde etildi», – denile.
Prokuraturada, sabıq deputat bir qaç qararnıñ qabul etilmesi içün rey berdi ve Qırım Muhtar Cumhuriyeti Yuqarı Radasınıñ «umumqırım referendumı»nı ötkerüv aqqında qararına qol tuttı, dep ilâve ettiler.
Qabaatlanğan şahısqa on eki yıldan on beş yılğa qadar azatlıqtan marum etüv cezası berilmek mümkün.
Qırım.Aqiqatnıñ menbası, bidirüvde Ukraina Kommunist fırqasınıñ azası Vladimir Demçenko aqqında aytılğanını añlattı.
Noyabrniñ 28-nde QMC prokuraturası, devletke hainlik ettiler deye şübhe altında tutulğan QMC Yuqarı Radasınıñ sabıq deputatlarına qarşı mahkemelerge 59 qabaatlav aktı yollandı, dep bildirdi.
Ukrainanıñ Baş prokuraturası, Qırım Rusiye tarafından ilhaq etilgen soñ, askeriy yeminni bozıp, yarımadadan qıtağa qaytmağan 73 Ukraina arbiy hadimini devletke hainlik etkenlerinde qabaatlay.
Halqara teşkilâtları, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
