Dekabrniñ 18-nde ilhaq etilgen Qırımda tintüvler ve tevqiflerge narazılıq bildirmek maqsadınen ypılğan bir kişilik piketlerniñ iştirakçilerine qarşı 60-tan ziyade mahkeme oturışuvınıñ yapılması, yarımadadaki Rusiye akimiyeti tarafından qırımtatar milliy areketiniñ faaliyetçilerine qarşı yapılğan tazyıqnıñ arttırılğanını köstere.
Bunı, Ukrainada Amnesty Internationalnıñ icracı mudiri Oksana Pokalçuk söyledi.
Ukrainada Amnesty Internationalnıñ matbuat hizmeti bildirgeni kibi, Pokalçuk: «İşğalci Rusiye akimiyeti, barışıqlı qırımtatar faaliyetçilerini taqip etip, qırımtatar azlığına qarşı repressiyalarınıñ sıñırlarını kettikçe daa ziyade kenişlete… Piket evelden uyğunlaştırılmasını talap etmey. Bu sebepten bu piketler, bir çoq meskün yerlerde aynı vaqıtta keçseler de, Rusiye qanunları noqtai-nazarından bile bütünley qanuniy ediler», – dedi.
O, «Rusiye tarafından işğal etilgen territoriyada öz qanunlarınıñ qullanılması, asılında halqara hümanitar uquqınıñ bozuluvı olğanını unutmamalı», dep ilâve etti.
Rusiye tarafından açıq menbalarda bu hususta izaat berilmedi.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerildi. Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde berilgen hulâsa, qabaatlav tarafınıñ esas delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
