Ukraina prezidenti Petro Poroşenko BMT (OON) Baş Assambleyası 72-nci sessiyasınıñ ilhaq etilgen Qırımda insan aqları bozulğanı boyunca qabul etilgen rezolütsiyasını alğışlap, «Qırım meselesi» halqara arenada aktual olıp qalğanını qayd etti.
«Rezolütsiyanıñ müellifdeş ve oña qol tutqan Ukrainağa bağlı Qırımnıñ kerçek dostlarına minnetdarım. Moskvanıñ «Qırım meselesini» qapatmaqnen bağlı gibrid teşebbüslerine baqmadan, Qırımnıñ azat etüvindeki halqara cebe quvetleşe», – dep yaza prezident Faceboookta.
Dekabrniñ 19-nda BMT (OON) Baş Assambleyası Qırımda insan aqları boyunca rezolütsiya qabul etti.
Rey berilgen soñ, vesiqanıñ qabul etilmesine 70 devlet qol tuttı, 26-sı – qarşı çıqtı ve 76-sı – bitaraf oldu. Rezolütsiyağa qarşı çıqqanlar arasında Ermenistan, Beyazrusiye, Rusiye, Suriye, Zimbabve ve başqaları bar.
Vesiqada Rusiye BMT (OON) Halqara mahkemesiniñ Qırımda qırımtatar halqı Milliy Meclisiniñ yasaqlanmasınen bağlı qararnıñ lâğu etilmesi ve yarımadada ukrain ve qırımtatar tillerinde tasil berilüvinen bağlı muvaqqat tevsiyelerniñ temin etilmesi talap etile.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.
