Bütün Qırım boyunca 60-tan ziyade mahkeme, tintüvler ve tevqiflerge narazılıq köstermek maqsadınen bir kişilik piketlerge çıqqan qırımtatarlarğa qarşı memuriy cöreme tayin etüv aqqında qarar berdiler. Bunı Qırım.Aqiqat muhbiri bildire.
Yedi mahkeme oturışuvı başqa künge keçirildi, beş memuriy protokol ğayrıdan tahqiq etilüv içün yollanıldı. Faaliyetçilerniñ ekseriyeti üstüne 10 biñ rublelik (4700 hrivna) cöreme yazıldı.
Canköyde beş qırımtatarğa 15 biñ rublelik (7100 hrivna) cöreme tayin etildi.
Adliyeci Lilâ Gemeci, Qırım.Aqiqat içün bergen izaatta, qorçalayıcı taraf eñ başından aqlav qararlarınıñ berilecegini beklemedi, dep qayd etti.
«Adekvat mahkemeciler tam bir azlıqnı teşkil etti. Qorçalayıcı tarafqa işniñ materialları ile tanış olmaq içün pek az vaqıt berildi. O, ise 200 saifege yaqın edi. Qorçalayıcı tarafnıñ talapları mahkemeciler tarafından red etildi. İşniñ materiallarında, ötkerilgen piketlerniñ bir niyetnen yapılğanlarını sanki tasdiqlağan eñ azından bir ekspertiza hulâsası bar. Bu hulâsa zır-cailce, çalışuv muddeti bir yıldan az olğan mutehassıs tarafından azırlandı. Biz, daa evelki tecribemizge esaslanıp, memuriy cezalar mutlaqa olacağını bile edik. Bilmegenimiz tek şey, bularnıñ cöremeler, yoqsa islâh etici işler olacağı edi», – dedi Gemici.
Adliyeciler, mahkemelerniñ qararlarına qarşı appelâtsiya bermekni planlaştıra ve İnsan aqları boyunca Avropa mahkemesine şikâyetler azırlaylar.
Gemici: «Biz, appelâtsiyanıñ er şeyni olğanı kibi qaldıracağını bilemiz. İşlerniñ pek çoq olğanını köz ögünde tutıp, menim fikrimce, biz olarnı bölecekmiz. İşlerniñ bir qısmı İnsan aqları boyunca Avropa mahkemesine yollanacaq ve daa bir qısmı – BMTniñ İnsan aqları boyunca komitetine», – dep ilâve etti.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerildi. Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ esas delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
